Prezidan ameriken an, Donald Trump, siyen nan jounen vandredi 24 avril 2020 an yon lejislasyon ki ofri 484 milya dola asistans pou ede mèt tibiznis yo ak lopital yo k ap redi anba gwo presyon pandemi kowonaviris la mete sou yo; jiska prezan maladi a touye plis pase 50 mil ameriken e li koze gwo devastasyon nan ekonomi an.
Lejislasyon –ki tounen yon lwa depi Prezidan an fin siyen l nan- se dènye eleman nan efò gouvènman federal la ap deplwaye pou l ede biznis ki te oblije fèmen pòt yo oubyen ki te obliye chanje fason yo opere; asistans sa a pral ede yo reprann oubyen kontinye aktivite yo. Seremoni siyati a dewoule nan moman kote eta ameriken yo ap eseye bloke pwopagasyon viris la.
Pandan 5 semèn ki pase yo, anviwon 26 milyon moun aplike Ozetazini pou yo jwenn asistans chomaj –swa apeprè yon travayè ameriken sou 6. Prezidan Trump deklare:
“Mwen di Kongrè a mèsi poutèt li tande apèl mwen te lanse pou m mande l apwouve asistans sa a ki tèlman enpòtan. Sa se yon gwo kokenn chenn viktwa.”
Sepandan si lejislasyon an te pase nan 2 chanm yo avèk fasilite, sa kite sou chemen an yon gwo obstak manm Kongrè a pral genyen pou yo janbe lè yo va ap anvizaje vote lòt pwojèò-lwa ou pwopozisyon-lwa pou yo ajoute sou pwogram asistans la plis kòb ki va nesesè pou gouvènman an kontinye fè fas ak kriz sante kowonaviris la kreye nan peyi a.