Accessibility links

Prezidan Trump Rejte Pawòl Kap Pale kòm Kwa li te Itilize Mo Vilgè Kont Ayiti ak Peyi Afriken yo

  • Ekip Sèvis Kreyòl VOA

Prezidan Donald Trump tap pale nan sal Roosevelt la, Jedi 11 janvye 2018.

Prezidan ameriken an, Donald Trump, mete yon mesaj sou kont Twitter li vandredi 12 janvye 2018 la pou l rejte pawòl ki sòti nan laprès kòmkwa li te itilize move mo kont ayisyen, salvadoryen ak afriken pandan yon rankont sou imigrasyon, jedi 11 janvye 2018, ak palmantè Repibliken e Demokrat nan Lamezon Blanch. Prezidan Trump rekonèt li te itilize yon langaj ki di pandan rankont sa a men li pat janm di pawòl yo di ki sot nan bouch li yo.

Dapre premye nouvèl yo, Prezidan Donald Trump te etone plizyè palmantè ki tap patisipe nan yon rankont nan Lamezon Blanch sou imigrasyon jedi lè li te swa-dizan sèvi ak move pwopo pou l dekri Ayiti ak peyi Afriken yo.

Prezidan Trump di "pou kisa nou genyen tout moun sa yo ki soti nan peyi s.. kap vini isit la." Jounal Washington Post rapòte nouvèl la an premye epi chèn televizyon CNN konfime l. Expresyon Prezidan an te itilize pou Ayiti ak peyi Afriken yo gen pou wè ak salte e povrete.

Lidè ameriken an di ankò, Etazini dwe kite antre nan peyi a moun ki soti nan peyi tankou Nòvèj. Premye minis peyi sa a te rankontre Prezidan Trump mèkredi nan Lamezon blanch.

Aprè laprès te poze kesyon sou deklarasyon Prezidan an, pami medya yo genyen Lavwadlamerik, Lamezon blanch te pibliye yon deklarasyon ki di Prezidan an ap aksepte sèlman yon antant sou imigrasyon kap "fè-fas ak sistèm lotri viza a ak migrasyon an chèn nan ki she de pwogram ki pa bon pou ekonomi nou an e ki pèmèt teroris antre nan peyi nou an."

Migrasyon an chèn nan se yon tèm moun kap kritike imigrasyon yo itilize pou fè referans ak sistèm ki pèmèt imigran fè demand rezidans pou fanmi yo antre ozetazini.

La mezon blanch pa ni konfime ni demanti ke Prezidan Trump ta sèvi ak move pwopo lè l tap pale konsènan Ayiti ak peyi Afriken yo.

Deklarasyon mezon blanch pibliye a di tou Prezidan Trump ap toujou rejte "mezi ki danjere, fèb e tanporè kap kreye pwoblèm pou imigran kap chèche yon lavi miyò ozetazini gras ak mwayen legal."

Lavwadlamerik te pran kontak ak biwo senatè ameriken ki te patisipe nan rankont la. Kèk konseye palmantè yo ki te prezan nan rankont la pat vle fè kòmantè sou deklarasyon Prezidan Trump yo, daprè ajans nouvèl Associated Press.

Anbasadè Ayiti a nan Washington Paul Altidor di Lavwadlamerik li kondane deklarasyon Prezidan Trump la.

Mia Love, yon depite repibliken ki se pitit Ayisyen, lanse apèl pou Prezidan Trump prezante exkiz bay pèp Ayisyen an.

XS
SM
MD
LG