Accessibility links

Ti Gwav: Lapolis Arete 3 Bandi e Li Sezi Zam

  • VOA Nouvèl

Lapolis nan vil Tigwav fè plizyè arestasyon e sezi zam ak materyèl bandi yo konn itilize pou fè move zak kont popilasyon an, nan kad yon operasyon kont gang nan rejyon an.

Lè korespondan Lavwadlamerik mande youn nan bandi yo poukisa li lage kò l nan move zak konsa, li reponn se sitiyasyon mizè ki gen nen peyi a ki fòse l antre nan aktivite gang. Jij ki t al fè konsta a lanse apèl bay otorite santral yo pou l mande yo mete ekipman ki nesesè a la dispozisyon polisye Ti Gwav yo pou yo kapab fè fas ak zak kriminèl k ap ogmante nan rejyon an.

Yon lòt kote, pandan Ayiti ap prepre l pou eleksyon novanm 2010 yo, otorite yo ap resevwa plis apèl ki mande pran dispozisyon ki nesesèpou ayisyen k ap viv nan dyaspora a kapab vote. Youn nan dènya vwa ki leve pou defann dwa dyapora a pou l patisipe nan pwosesis elektoral la se Max Numa, dwayen Fakilte Syans Politik nan Inivèsite Kiskeya.

Mesye Numa raple, ayisyen k ap viv a letranje yo voye anviwon 2 milya dola chak ane al kore ekonomi ayisyèn nan, gras a transfè yo fè pou manm fanmi yo k ap viv nan peyi a. Alòs mesye Numa di: "li nòmal pou yon gouvènman ki genyen yon vizyon nasyonal panse kite dyaspora a patisipe nan pwosesis elektoral la."

Anfen, eleksyon ki fikse pou 28 novanm yo kontinye pwovoke reyaksyon. Se konsa nan Plato Santral la, reprezantan lokal gwoup opozisyon altènativ lanse yon apèl pou l mande yon bòykòt vòt la, paske daprè yo Konsèy Elektoral Pwovizwaa gen yon sèl misyon: se fè yon jan pou rezilta eleksyon an ale an favè pati ki sou pouvwa a, INITE. Tandis ke nan vil Jakmèl delege depatmantal la pale pou l di KEP a merite konfyans e li pral òganize eleksyon lib, onèt e demokratik.

Korespondan nou yo atravè Ayiti devlope nouvèl sa yo pou nou.

Klike sou ikòn MP3 ki anwo e adwat atik sa a pou w koute repòtaj VOA kreyòl pou jounen 30 out 2010 la

XS
SM
MD
LG