Accessibility links

Premye Minis Britanik la Kritike Prezidan Trump Poutèt yon Tweet li Ekri Kont Mizilman yo

  • Ekip Sèvis Kreyòl VOA

Premye minis Britanik la, Theresa May, nan Lond, Grand Bretay, 27 novanm 2017.

Kèk palmantè britanik te move kou kong mèkredi 29 novanm 2017 la, apre Prezidan ameriken an, Donald Trump, te repibliye sou kont Twitter li kèk videyo anti-mizilman yon lidè nasyonalis britanik ekstrèm dwat te poste sou kont li; lajistis britanik te jwenn lidè sa a koupab dèske li itilize diskou kap preche lahèn kont gwoup rasyal.

Anpil lejislatè britanik lanse apèl pou yo mande premye minis Theresa May anile yon vizit travay lidè ameriken an gen pou l fè nan La Grann Bretay pandan ane 2018 la. David Lammy, yon palmantè Pati Travayis la, deklare: “Trump pa ni yon alye, ni yon zanmi pou nou.”
Misye Lammy ajoute prezidan ameriken an pa merite resevwa yon bèl akèy si li vini nan La Grand’ Bretay.

Bò kote pa l, majistra vil Lond la, Sadiq Kahn, deklare li parèt plizanpli klè mesye Trump pa ta dwe santi l lap byenveni nan Grann Bretay e li ta dwe konnen anpil sitwayen britanik konsidere sa l ap ekri nan twit li yo kòm yon trayizon relasyon amerikano-britanik yo. Misye Khan fini pa di:

“Premye minis peyi nou an ta dwe itilize tout enfliyans li-menm ak gouvènman li a genyen sou Prezidan Trump ak administrasyon li a pou mande li efase twit sa yo epi prezante ekskiz li bay pèp britanik la.”

Anfen, pòtpawòl Premye Minis Theresa May a deklare Prezidan Trump fè yon move bagay lè li repwodui videyo sa yo sou kont Twittter li.

"Se yon gwo majorite pèp britanik la ki rejte diskou plen prejije sektè ekstrèm dwat la, yon diskou ki totalman opoze ak prensip peyi nou an reprezante yo: se desans, tolerans ak respè. Prezidan an poze yon move aksyon lè li fè sa l fè a."

XS
SM
MD
LG