Anbasadè ameriken an ann Ayiti, Michele J Sison, ki reponn kesyon anvwaye espesyal Sèvis Kreyòl la nan Pòtoprens, Jacquelin Belizaire, di pandan rankont CORE group la te genyen ak Prezidan Jovenel Moise, youn nan pwen diskisyon yo se te nesesite pou prezève stabilite, lapè, etadedwa ak demokrasi nan peyi a. Pi lwen diplomat la eksprime satisfaksyon li pou seri konsiltasyon Misye Moise an ap fè ak diferan sektè nan peyi a sou chwa pwochen Premye Minis la.
Reprezantan Etazini ann Ayiti di Washington ap travay ak gouvènman ayisyen an pou mete sou pye yon pwogram devlopman ak kwasans ekonomik yon fason kreye travay, espesyalman pou jèn ayisyen yo, dekwa pou evite plis mouvman levekanpe tankou sa ki te frape kapital la nan dat 6,7 ak 8 jiyè pase a. N ap Envite ou suiv yon ekstrè nan entèvyou a.
