Accessibility links

Senatè Ameriken Dick Durbin Vizite Ayiti

  • Ronald César

Senatè Ameriken Dick Durbin

Senatè ameriken Dick Durbin, yon demokrat ki reprezante eta Illinois, lanse apèl bay pèp amerikan an pou yo kontinye ede pèp ayisyen an.

Senatè Durbin fè deklarasyon sa a nan jounen madi 24 janvye a nan sena Etazini an, kèk jou aprè yon vizit li te fè nan nasyon karayib sila a. Se twazyèm vizit Senatè Dick Durbin ann Ayiti.

Li fè konnen gen anpil travay ki rete pou fèt, sepandan li rekonèt ke gen vrè amelyorasyon ki fèt 2 zan aprè tranblemanntè a. Senatè ameriken an di gen mwatye nan moun ki t ap viv anba tant yo ki abite nan kay kounye a. Li di yon ti kontribysyon kapab fè anpil chanjman :

"Sa se yon leson pou n aprann ozetazini, asavwa ti kontribyen nou bay vrè kote ki nan bezwen yo, kapab chanje lavi anpil moun nan peyi ki pi pòv yo sou latè yo."

Senatè Durbin site kòm ekzanp travay Gheskyo ap fè ann Ayiti. Li di gwoup sa a, ki fè yon patenarya ak Sant pou Kontwòl ak prevansyon maladi a (CDC), demontre ki sak ka fèt avèk yon ti envestismasn Etazini fè ann Ayiti.

Li di gwoup sa a fouye yon pwi, yo trete dlo a, e yo mete dlo-potab a dispozisyon 120 mil moun nan yon kan, e pwojè a koute sèlman 20 mil dola ameriken:

"Mounn ki abite nan kan sa a ak mounn ki resevwa dlo-potab nan pwi sa a, konnen ke pèp ameriken an sousyeu de sitiyasyon yo, e li pèmèt yo fouye yon pwi ki ba yo bonjan dlo pou pitit yo e manm fanmi yo. Nou menm ameriken, nou kapab fè plis, e nou dwe fe plis, menm avèk mwayen limite nou yo."

Senatè Durbin t al vizite tou Zanmi Lasante e li chante lwanj pou travay y ap fè ann Ayiti.
Senatè Dick Durbin, se dezyèm demokrat pi wo plase nan sena Etazini an, e li se manm komisyon afè etranje sena a. Li t al ann Ayiti pou l te ka wè ak pwòp je li efò Etazini ak kominote entènasyonal la fè pou ede rekonstwi nasyon karayib la ke yon tranblemanntè te devaste an 2010.

Senatè Durbin se otè plizyè pwopozisyon-de-lwa sou Ayiti, tankou Akt Reforestasyon an, yon lejislasyon ki t ap mete asistans ak ekspè ameriken sou reforestasyon a dispozisyon peyi d Ayiti.

XS
SM
MD
LG