Accessibility links

Seleksyon Nasyonal Foutbòl Brezilyèn nan ap Chache Yon Nouvo Antrenè

  • Jean Robert Philippe

Responsab foutbòl brezilyen yo fè konnen yo pa prese pou chwazi nouvo antrenè ki pral dirije seleksyon an nan koup dimond 2014 la y ap òganize. Federasyon an fè konnen li bezwen yon antrenè ki gen eksperyans kontrèman ak ansyen antrenè Dunga. Responsab yo di pèdi tit koup dimond la an 2014 se pral repetisyon koup dimond 1950 la ke yo te pèdi 2 a 1 devan Irigwe. Federasyon an fè konnen yo kapab fè yon anons nan fen mwa jiyè a. Pami non k ap site nan koulwa federasyon an nou jwen Luis Felipe Scolari ki ede Brezil ranpòte koup dimond la an 2002. Scolari siyen yon kontra 2an ak klib brezilyen Palmeiras e kapab pa disponib jiskan 2012. Lòt antrenè ki sou lis la se Vanderlei Luxemburg oak Muricy Ramalho. Brezil gen pou jwe yon match amikal kont Etazini pandan mwa out la epi kapab jwe 5 lòt rankont disi fen ane a.

FIFA ak Inyon Foutbòl Ewopeyen an menase pou pran sanksyon kont federasyon foubòl Bosni akoz responsab yo derefize chanje sistèm prezidan federasyon ki gen 3 prezidan( kwat, sèb ak mizilman) FIFA sot patisipe nan yon rankont ak espwa pou te konvenk federasyon an pou l adopte sistèm yon sèl prezidan pou yon meyè gouvènans. Se sèlman 27 delege sou yon total 60 ki vote an favè refòm nan federasyon an. Dapre regleman 2tyè delege yo dwe vote an favè refòm nan. Otorite foutbòl mondyal yo kapab adopte sanksyon kont federasyon an an Oktòb pwochen lè komite ekzekitif FIFA ak Inyon Foutbòl Ewopeyen an ap reyini. Se nan menm rankont sa a FIFA pral diskite kesyon si wi non y ap adopte nouvo teknoloji pou konnen lè balon an tonbe dèyè liy gò l la.Nan reyinyon FIFA ap fè Mèkredi y ap diskite sou posibilite prezans yon lòt abit dèyè kan gadyen yo.

Yon delegasyon FIFA rive o Japon pou kòmanse vizite vil ki kandida pou akeyi koup dimond la an 2018 ou an 2022. Se prezidan Federasyon Foutbòl Chili a k ap prezide delegasyon an. Delegasyon an gen pou vizite stad yo, enstalasyon radyo difizyon nan Osaka ak Tokyo nan kad vizit 2 mwa y ap fè nan 9 vil. Japon an konpetisyon ak Ostrali, Katar, Kore di Sid, Etazini, Rusi ak Angletè pou akeyi youn pami 2 tounwa foutbòl mondyal la. Espay / Pòtigal epi la Oland/ Beljik poze kandidati tèt ansanm. FIFA gen pou l reyini nan vil Zurik 2 Desanm pou seleksyone peyi òganizatè a.

Yon lòt kote balon ki te sèvi nan final koup dimond ant Espay ak La Oland vann pou 75 mil dola. Lajan an pral sèvi nan kanpay Nelson Mandela ap mennen kont maladi SIDA ak viris ki bay maladi a.

XS
SM
MD
LG