Accessibility links

Reyaksyon Pakistan sou Lanmò Oussama Bin Laden

  • Lyonel Desmarattes

Reyaksyon Pakistan sou Lanmò Oussama Bin Laden

Gouvènman pakistanè a kritike madi 3 me a operasyon twoup militè ameriken te lanse pou yo touye lidè al-Kaida a, Oussama bin Laden.

Otorite yon an Islamabad lanse yon avètisman bay tout peyi pou fè yo konnen pa genyen yon “baryè lib” ki ouvè pou moun al fè ”antre-sòti” nan Pakistan.

Ministè Afè etranjè peyi a fè konnen li genyen gwo kè-sote ak rezèv sou fason Lèzetazini te lanse yon operasyon militè –san gouvènman pakistanè a pat konnen e san otorizasyon otorite peyi a.

Ministè a ajoute sèvis ransèyman pakistanè a (I.S.I.) te pataje avèk Ajans ransèyman ameriken an, C.I.A., enfòmasyon sekrè sou rezidans bin Laden nan vil Abbottabad, pa lwen ak kapital la.

Daprè otorite yo nan Islamabad toujou, C.I.A. ak sèvis ransèyman kèk lòt peyi zanmi benefisye anpil ak enfòmasyon I.S.I. mete a la dispozisyon yo.

Sepandan gouvènman prezidan pakistanè a, Asif Ali Zardari, twouve l anba anpil presyon pou l eksplike kijan teworis lemond te pi ap chache a te fè kache nan yon gwo vila nan yon vil ki tou pre kapital la e ki chaje ak sòlda --pami yo genyen k ap travay ou k ap etidye nan yon akademi militè.

Nan yon atik ki parèt nan jounal ameriken The Washington Post, mesye Zardari rejte pawòl ki fè konprann otorite pakistanè yo t ap pwoteje bin Laden.

XS
SM
MD
LG