Accessibility links

Breaking News

Prezidan Obama ap Vizite World Trade Center a Apre Lanmò Bin Laden


Prezidan ameriken an Barack Obama ak ansyen Prezidan ameriken an Georges Bush
Prezidan ameriken an Barack Obama ak ansyen Prezidan ameriken an Georges Bush

Prezidan Barack Obama genyen pou l ale jedi 5 me 2011 la nan vil New York pou l onore viktim atak teworis ki te dewoule nan dat 11 septanm 2001 sou Lèzetazini –atak kote manm rezo teworis al-Kaida te fè 2 avyon al kraze sou 2 tou maras World Trade Center, youn te tonbe sou Pentagòn nan (kidonk, lokal Depatman Defans-la) nan Washington, epi yon 4èm te tonbe nan yon jaden nan Eta Pennsilvani.

Nan okazyon deplasman misye Obama ap fè New York la, li pral vizite anplasman World Trade Certer la kèk jou sèlman aprè manm yon kò-delit lame amerikèn te touye lidè al-Kaida a, Osama bin Laden, nan peyi Pakistan.

Prezidan ameriken an pral depose yon jèb flè nan anplasman an e li pral rankontre an prive avèk manm-fanmi viktim atak 11 septanm yo.

Daprè la Mezon Blanch, misye Obama pap fè okenn deklarasyon piblik.

Nan kòmansman semèn sa a, manm yon kò-delit nan La Marinn de gè Lèzetazini te touye Bin laden nan yon operasyon yo te lanse nan vil Abbottabad kote lame peyi Pakistan genyen yon akademi militè ak yon ganizon sòlda.

Prezidan Obama pran desizyon pou l pa kite yo pibliye foto ki montre kadav Bin Laden paske, daprè sa l di, imaj yo tèlman kri, sa ta kapab poze risk pou sekirite nasyonal Lèzetazini e menm ankouraje moun koze zak vyolans.

Nan yon entèvyou lidè ameriken an bay chèn televizyon CBS, li fè konnen pa genyen okenn dout nan tèt li ke lame amerikèn touye Bin Laden; nèg ki responsab atak 11 septanm 2001-yo sibi konsekans zak li te komèt yo, e viktim-yo jwenn jistis yo.

Yon lòt kote, pòt-pawòl Mezon Blanch la, Jay Carney --ki t ap abòde dosye a ak laprès mèkredi 4 me a-- deklare majorite nan pwòch-kolaboratè prezidan Obama yo deside kenbe foto Bin Laden yo sekrè.

Daprè misye Carney, diferan moun kapab genyen bon jan rezon, rezon solid pou di yo dwe pibliye ou pa pibliye omwen yon foto ki montre Bin Laden mouri tout bon; men otorite ameriken yo pa pral mete devan publik la okenn prèv vizyèl sou lanmò lidè rezo teworis al-Kaida-a.

XS
SM
MD
LG