Accessibility links

Prezidan Obama ap Negosye ak Lidè Kongrè a Sou Defisi Federal la ak Dèt Nasyonal la

  • VOA Nouvèl

Prezidan ameriken an Barack Obama, John Boehner a goch, ak lidè majorite sena a adwat, Senatè Harry Reid

Lidè kongrè ameriken an genyen ap fè madi 12 jiyè a 2èm rankont yo nan 2 jou avèk Prezidan Barack Obama nan moman pa gen okenn siyn ki ta montre 2 kan yo ta prèske rive jwenn yon antant nan negosyasyon y ap fè pou yo jwenn yon fason pou yo redui defisi federal la epi leve nivo planfon dèt nasyonal la.

Lendi Prezidan Obama te fè konnen li lè li tan pou lidè 2 pati yon an Kongrè a, repibliken e demokrat, mete konsiderasyon politik sou kote yon fason pou yo pèmèt Lèzetazini konsève dwa li pou l prete lajan, nan moman gouvènman an ap fè efò pou l redui defisi a.

Menm Lendi a, anvan Prezidan Obama te rankontre ak palmantè repibliken yo, li te di gen anpil travay ki rete pou fèt anvan pou 2 kan yo rive jwenn yon akò, e li pa dispoze siyen ditou yon rezolisyon ki ta pote yon solisyon tanporè pou pwoblèm dèt Lèzetazini an. Prezidan an te lanse apèl bay kan repibliken an pou mande l ede l jwenn rapidman yon solisyon sou dosye dèt la.

“Mwen tande zanmi repibliken mwen yo ap di depi lontan nou genyen yon obligasyon moral pou n regle pwoblèm dèt ak defisi nou yo ak mwayen ki djanm. Mwen tande yo di se youn nan bagay ki bay kè-sote nan peyi a e ki anpeche moun envesti nan sektè dafè a. Kidonk, mwen reponn pou m di yo : Ann fè bagay yo mache!”

Chèf minorite demokrat la nan Chanm Bas la, Nancy Pelosi, di li pa pral aksepte anyen k ap koupe sou lajan pwogram sekirite sosyal tankou Medicare, ki se yon pwogram asirans sante gouvènman federal la mete a la dispozisyon ameriken ki granmoun yo oubyen sila yo ki pa gen lajan pou peye pou asirans sa a.

Christine Lagarde
Christine Lagarde

Bò kote pa l, direktris tou nèf Fon Monetè Entènasyonal, fransèz Christine Lagarde, di pou kòmanse sa kapab kreye yon ogmantasyon nan to denterè yo:

"Si ou pran tout senaryo kote Lèzetazini pa ta ka fè okenn pèman sou dèt li yo, sa ta fè to denterè yo monte, mache labous la tap sibi pèt seryezman, e sa tap genyen konsekans grav ni pou Lèzétazini ni pou ekonomi mondyal la. "

Malgre tou, palmantè nan 2 pati ameriken yo deside kenbe pozisyon yo sou pwoblèm nan, kòmanse pa prezidan Chanm Depite a, repibliken Eta Ohio John Boehner. Lendi a, misye Boehner te di laprès yon antant sou bidjè a pap pase nan Chanm Bas la si li vini ak yon ogmantasyon nan taks yo, oubyen plis rediksyon nan pwogram sosyal ki popilè yo, ki benefisye moun pòv yo ak granmoun aje yo.

John Boehner
John Boehner

John Boehner te di:

“Pèp ameriken an pa pral aksepte e Chanm Depite a pa pral pase yon lwa k ap ogmante taks moun k ap kreye djòb nan peyi a.”

2 pati yo gen jous 2 out pwochen pou yo jwenn yon akò oubyen Lèzetazini ap twouve l nan enposiblite pou l peye dèt li; se pou la premyè fwa yon bagay konsa t ap rive nan tou istwa peyi a.

XS
SM
MD
LG