Accessibility links

Breaking News

Prezidan Obama Anonse Lòt Plan Pou L Relanse Ekonomi an


Prezidan ameriken an, Barack Obama, pran mèkredi 8 septanm 2010 la wout eta Ohio kote li pral anonse lòt plan gouvènman n nan genyen pou l bay ekonomi an jarèt e kreye travay Ozetazini.

Misye Obama pral anonse kèk plan pou l ogmante e pwolonje yon kredi sou taks pou rechèch ak devlopman --yon desizsyon ki kapab ede ti biznis yo, paske se yo ki repreznate sous pi fò nouvo djòb ki kreye yo.

Prezidan ameriken an pral pran lapawòl sou eta ekonomi an nan vil Cleveland kote egzateman lidè minorite repibliken an nan Chanm dè Reprezantan an, John Boehner, te pale mwa pase a pou l lonje dwèt sou politik ekonomik administrasyon Obama a e li te menm bay misye Obama konsèy pou l revoke kèk nan prensipal konseye ekonomik li yo.

Lendi 6 septanm 2010 la, pandan misye Obama te nan vil Milwaukee, nan Eta Wisconsin, li te reponn misye Boehner ak tout lòt kòlèg repibliken n yo.

Prezidan Obama di : “Nou deja eseye sa yo pa sispann mande a. Nou te fè sa pandan 10 zan. E kisa sa ban nou? Se pi move ekonomi an depi ane 30 yo ak yon defisi nou pat janm genyen nan tout istwa nou."

Pandan Prezidan Obama ap nan vil Cleveland, li pral pale klè pou l di li pa dakò ak efò Repibliken yo ap deplwaye nan Kongrè a pou yo pèmèt moun rich yo benefisye ekstansyon kredi sou tak la --yon ekstansyon ki pral pran fen nan finisman ane 2010 la.

XS
SM
MD
LG