Prezidan ameriken an, Barack Obama, lanse bay òm politik yo nan Wasington yon apèl prese-prese kote l mande yo pa fè politik ak asistans federal ki dwe al jwenn moun ki viktim move konsekans siklòn Irèn ki te pase sou kòt ès Lèzetazini sa genyen 2 weekend.
Dimanch 4 septanm 2011 la, Misye Obama t al wè ak 2 je li dega siklòn nan koze nan New Jersey kote li te vizite 3èm pi gwo vil Eta sa a, Paterson. Siklòn Irèn koze gwo inondasyon nan vil la, e jiskaprezan gen anpil zòn ki anba dlo toujou.
Nan yon mesaj Prezidan Obama te pote bay sinistre yo nan New Jersey, li di moun yo:
"Tout peyi a ankè kanpe avèk nou. E nou pral chache garanti nou ofri tout resous ki nesesè pou rekonstui kominote sa yo. Mwen byen konnen gen moun ki pale pou mande eske efò k ap fèt pou finanse travay rekonstriksyon dijans la pa bò isit la, pa pral ralanti ? An tan ke Prezidan ameriken, mwen vle pale klè pou m di : Nou pral respekte obligasyon nou kòm gouvènman federal. "
Siklòn Irèn te koze gwo destriksyon sou kòt ès Lèzetazini, depi Eta Kawolin di Nò rive jous nan Eta Vermont. Li touye o mwen 40 moun tandiske li fè dega pou pliyzè milya dola. Prezidan Obama fè vizit li a nan New Jersey nan moman previzyon meteo fè konnen lapli pral tonbe semèn sa a ankò sou pati nòdès Lèzetazini.