Accessibility links

Breaking News

Prezidan Barack Obama Anonse Yon Plan Pou L Fè Plis Rediksyon nan Defisi Federal la


Prezidan ameriken an Barack Obama

Prezidan ameriken an, Barack Obama, fè konnen nan kòmansman mwa septanm nan li pral mete devan pèp la yon plan pou l redui gwo kokenn defisi ki genyen nan bidjè federal la; e rediksyon sa a ap pi gwo lontan pase sa administrasyon n nan ak Kongrè a te deja prevwa a.

Mèkredi 17 out 2011 la, pandan misye Obama t ap vizite Eta Ilinwa --eta kote li te abite anvan li te monte sou pouvwa a- li pale ak yon gwoup sitwayen pou l di yo rediksyon l ap pwopoze pou defisi a prale pi lwen lontan pase mil milya 500 milyon dola. Prezidan an site sòm lajan sa a paske se objektif travay yon komisyon ki gen ladan n reprezatan tou lè 2 pati yo nan kongrè a.

Misye Obama di :

« Nou pa gen okenn rezon pou n pa pase alaksyon kounyela menm. E, pandan 2 zou 3 semèn k ap vini la yo, mwen pral prezante plis pwopozisyon pou n mete moun nan travay imedyatman. Mwen rekonèt kèk nan pwopozisyon sa yo pral koute lajan. E fason nou pral peye pou yo se nan fè plis rediksyon nan defisi a pase sa nou te prevwa nan antant nou te jwenn ak Kongrè a a la dènyè minit pou n te anpeche Etazini rive nan yon pwen kote l pa t ap ka peye dèt li. Nou pa fè tout sa nou te ka fè jiskaprezan. »

Misye Obama pale konsa pandan li t ap vizite Eta Ilinwa, dènye etap yon virewon nan otobis li fè nan pati sant-wès Lèzetazini -virewon ki te mennen li tou nan eta Minnesota ak Iowa.

Nan mesaj lidè ameriken an mete devan moun yo mèkredi, li pale de rekonstriksyon wout, pon ak lekòl Ozetazini; daprè li, pwojè konsa toujou jwenn apui ni Pati Demokrat la, ni Pati Repibliken an.

XS
SM
MD
LG