Accessibility links

Breaking News

Ayiti-Ensekirite: PNH Di Li Gen Prèv Misyonè Gang Kidnape yo Vivan Toujou


Ayisyen nan katye Titanyen ki te pran lari pou yo mande liberasyon misyonè yo nan dat 19 okt. 2021.

Yon sous nan PNH deklare: "Nou gen prèv ke tout otaj yo vivan," san li pa presize ki kalite prèv sa ye. Ravisè te mete men sou misyonè yo nan dat 16 oktòb pase a nan moman yo t ap kite yon òfelina nan yon zòn ki sitiye a lès Pòtoprens e ki anba kontwòl youn nan gang ki pi puisan yo.

Daprè prèv Polis Nasyonal Ayiti (PNH) ta resevwa, misyonè etranje (16 ameriken ak yon kanadyen) gang kidnape yo, vivan toujou. Se sa yon sous polisye fè Agence France Presse konnen nan jounen jedi 28 oktòtb la. Yon sous nan PNH deklare:

"Nou gen prèv ke tout otaj yo vivan..."

san li pa presize egzakteman ki kalite prèv otorite lapolis yo gen nan men yo.

Ravisè te fè dappiyanp sou misyonè yo ak fanmi yo 16 oktòb pase a nan moman yo t ap kite yon òfelina nan yon zòn ki a lès kapital la, Pòtoprens, ki anba kontwòl youn nan gang ki pi puisan yo.

Daprè lapolis toujou, negosyasyon k ap fèt ak kidnapè yo pou liberasyon otaj yo ap pwogrese e plizyè ajan FBI twouve yo an Ayiti pou ede yo nan efò sa a.

Christian Aid Ministries -òganizasyon kote misyonè yo travay- deklare pami otaj yo gen 12 granmoun ki gen ant 18 ak 48 an, plis 5 timoun ki gen ant 8 mwa ak 15 zan.

Gang "400 Mawozo a" kenbe otaj yo e li mande yon ranson $1 milyon dola pa tèt pou l lage yo. Nan yon videyo lidè gang nan, Wilson Joseph (alyas Lanmòsanjou), te pibliye sou rezo sosyal yo semèn pase a, li te menase pou l touye otaj yo. Videyo a montre Lanmòsanjou, avèk yon gwoup ame alantou li, ki te kanpe devan kèk sèkèy ki te swadizan gen ladan yo kadav 5 manm gang la lapolis te touye. Misye te deklare:

"Puiske yo pa ban mwen sa m bezwen, mwen pral touye ameriken sa yo."

Gouvenman Etazini an bay ameriken konsèy pou yo pa vwayaje an Ayiti, sitou akoz afè kidnaping sa a ki vize sitwayen ameriken byen souvan.

Gang ki kontwole pi fò tèritwa ayisyen an deja fè plis pase 782 kidnaping pou ranson ane sa a, daprè Rezo Nasyonal Ayisyen pou Defans Dwamoun, RNDDH, yon sant rechèch ak analiz sou dwazimen ki gen katye jeneral li nan Pòtoprens.

Enfòmasyon pou repòtaj sa a sòti nan Agence France Presse.

Facebook Forum

XS
SM
MD
LG