Accessibility links

POLITIK USA: DEMOKRAT YO REYAJI APRE VOT SOU REDIKSYON TAKS LA

  • Ekip Sèvis Kreyòl VOA

Lidè Pati Demokrat nan Chanm Bas la, Nancy Pelosi (D-Kalif.), ki tap pale nan yon konferans pou lapres nan Kongrè a nan Washington (Foto: 19 desanm 2017).
Apre 2 chanm Kongrè ameriken an te vote sa Prezidan Donald Trump rele "Rediksyon taks ki pi gwo, pi masif nan tout istwa Lèzetazini", lidè demokrat yo reyaji pou yo denonse ni fason vòt la te fèt la, ni kontni nouvo lwa a.

Lidè minorite a nan Sena a, Chuck Schumer (D-NY), te pale tout suit apre vòt la te pase mèkredi 20 desanm 2017 la pou l denonse sa li rele "twou vid" ki genyen nan lwa a.

Lidè minorite a nan Sena ameriken an, Chuck Schumer (D-N.Y.)
Lidè minorite a nan Sena ameriken an, Chuck Schumer (D-N.Y.)

"Gwo konpayi yo chaje ak lajan jounen jodi a; machedlabous la ap vale teren; men pa gen pyès kreyasyon travay. Yon bann ak yon pakèt gwo konpayi deja pare pou yo pwofite de twouvid ki nan lwa a, mete sou rediksyon taks lap ba yo, pou yo domine machadlabous la e pou yo fè tout kalite pwofi sou envestisman yo, tandiske lwa a pa pote anyen pou Ameriken mwayen yo."

Lidè minorite a nan Chanm Bas la, Nancy Pelosi (D-Kalifòni), pataje opinyon Senatè Chuck Schumer a.

"Ti miyèt manje y ap kite tonbe pou fanmi k ap travay yo se yon ti zo tou piti e se yon benefis tanporè; tandiske rediksyon taks y ap bay gwo biznis yo, gwo konpayi yo, se gwo kokenn-chenn avantaj, se benefis pèmanan."

Benefis nouvo lwa a ap pote pou klas travay la gen pou pran fen nan lane 2025, e refòm k ap vini avèk li yo pral ajoute yon trilyon dola nan 10 zan sou dèt nasyonal la ki se 20 trilyon dola jounen jodi a.

XS
SM
MD
LG