Accessibility links

Breaking News

Ayiti Politik: Gouvènman an Kenbe Pwojè Referendum nan an Plas Tandiske Opozisyon an Kontinye Rejte Li


Nan mesaj Prezidan Jovenel Moise te mete devan pèp la nan okazyon Jou Drapo ak Inivèsite a, madi 18 me 2021 an, li te preche linyon ak tèt-ansanm kòm mwayen pou jwenn yon solisyon pou yon kriz politik k ap dire depi lontan nan peyi a. Lidè ayisyen an te deklare, antwòt:

“… Mwen vle nou tout met tèt ansanm pou nou etone lemond kèlkeswa kote w ye, kèlkeswa koulè ou, kèlkeswa nivo lajan ke w genyen. Men, konnen byen si w gen yon ti moso byen Leta nan men w, fò w pote l ban mwen; paske, si w ap vin nan negosyasyon an, ou pa ka vini avèk anyen nan pòch ou. Ti moso a, se pou w ban mwen l epi pou m mete l a dispozisyon pèp la… Sa vle di negosyasyon an, se pou l fèt san okenn preyalab; se pou nou chita, pou n pale; pou nou youn kriye nan bra lòt; se pou nou pale, pou nou di kisa ki fè nou mal….”

Ansyen depite Jerry Tardieu, ki bay Lavwadlamerik yon entèvyou sou plan gouvènman genyen pou l òganize yon referendum nan dat 27 jen pwochen an epi prepare eleksyon anvan fen ane a, atire atansyon sou twou vid ki ta genyen nan efò otorite yo ap deplwaye pou yo avanse avèk 2 chantye sa yo, espesyalman sou sa l konsidere kòm enkonsistans ki egziste, dapre li, nan 2 vèsyon tèks komisyon konsiltatif la prepare pou refòm pouvwa an plas la vle fè nan konstitisyon an. Pou Misye Tardieu ilistre opinyon li a, li fè konnen, pa egzanp, 2 dokiman yo pa di menm bagay konsènan dire manda Prezidan Jovenel Moise la. Ansyen palmantè a ajoute:

“ De tout fason, pwojè sa a, nan 2èm vèsyon l nan, se yon pwojè anti-demokratik; e nan fòm li, nan fon li, s on pwojè ki pral bay pwoblèm; s on pwojè ki vin pou l divize peyi a. Epi paradòks: lè n ap tande diskou Jovenel Moise nan okazyon 18 me a, kote l ap mande inite, l ap mande fratènite pandan ke l ap vanse tèt bese nan yon pwojè ki pral bay divizyon, hinghang ak tèt chaje…”

Bò kote pa l, Mèt André Michel, ko-lidè regwoupman politik Sektè Demokratik ak Popilè a, rejte kategorikman tout posiblite pou l ta apiye lide referendum nan oubyen eleksyon avèk Prezidan Jovenel Moise. Misye Michel, ki t ap patisipe nan yon pwendprès li menm ak kòlèg li yo bay vandredi 21 me 2021 an sou estrateji yo pral itilize pou yo fè referendum nan echwe, pwofite okazyon an pou l anonse yon toune dirijan sektè a pral òganize atravè peyi a nan kad yon kanpay pou ankouraje popilasyon an boude envitasyon pouvwa an plas la lanse pou l mande pèp la patisipe nan konsiltasyon popilè 27 jen an. Avoka Michel fè konnen:

“ Nan tounen nou pral fè, nan virewon nou pral fè nan zòn metwopolitèn nan, nan tout peyi a, sòti dimanch 23 me pou rive dimanch 30 me, nou pral mobilize popilasyon an. Nou pral mobilize pèp la pou nou kraze pakanpak referendum sa a; paske referendum sa a se yon pwovokasyon. Popilasyon an dwe konprann: tout sa w wè ki make referendum, kraze l… bandwòl referendum, kraze l… depi yon bagay make referendum, kraze l. C’est une provocation; on me peut pas accepter ça… Nou pa ka nan yon peyi, pou yon sèl nèg kanpe, li vle fè yon konstitisyon pou kont li. Ce n’est pas normal. Le mot d’ordre est clair: nou dwe kraze pakanpak referendum Jovenel Moise la. La mobilisation doit être totale…

Pandansetan, nan jounen jedi 20 me 2021 an, Palman Ewopeyen an adopte yon rezolisyon sou sitiyasyon an ann Ayiti -rezolisyon kote, antwòt, li priye otorite peyi a òganize eleksyon lejislatif, lokal e prezidansyèl ki lib, onèt, transparan e ki merite konfyans; epi yo dwe garanti yon sekirite efikas pandan dewoulman pwosesis elektoral la. Nan dokiman an, kote palmante yo denonse fenomèn restavèk la kòm yon sòt de “esklavaj modèn”, yo lanse apèl pou yo mande fonksyonnman yon sistèm jistis endepandan ki pi ouvè e ki sèvi tout moun san paspouki, pandan yo mande gouvènman ayisyen an respekte Konstitisyon 1987 la, espesyalman atik 284.3, respekte prensip fondamantal demokrasi yo epi pèmèt etadedwa blayi nan peyi a.

XS
SM
MD
LG