Oganizasyon Eta Ameriken yo (OEA) anonse li pral voye reprezantan li obsève dewoulman pwochen eleksyon yo nan peyi d Ayiti. An menm tan tou, òganizasyon rejyonal la fè Konsèy Elektoral Pwovizwa a kèk pwopozisyon pou evite iregilarite ki te genyen nan eleksyon pase yo.
Bò kote pa li, direktè egzekitif KEP a, Uder Antoine, fè konnen enstitisyon an pran tout dispozisyon pou eleksyon yo dewoule yon fason onèt, lib, e demokratik. Misye Antoine pale konsa nan moman dirijan KEP a ap vizite divès sikonskripsyon pou evalye eta biwo de vòt yo epi rekrite manm ekip ki pral travay nan biwo sa yo pandan jounen elektoral la.
Anfen, konsila ayisyen yo nan Repiblik Dominikèn lanse yon pwogram kote anplwaye yo ale nan batèy pou ede ayisyen ki bezwen dokiman legal pou yo regilarize estati yo. Serge Junior Fécu, kap etidye diplomasi nan Peyi Panyòl, di nou benefisyè yo kapab fè batistè yo ak paspò yo sou plas san yo pa bezwen ale nan anbasad la nan Santo Domingo.