Nan Libi, rebèl yo fè konnen yo fè kèk pwogrè nan vil Misrata ke fòs gouvènmantal yo antoure, pandan Nasyonzini lanse apèl pou l mande asistans nan efò l ap fè pou l pote sekou bay moun k ap eseye pati kite peyi a pa bato.
Daprè rebèl yo toujou, yo rive repouse fòs ki fidèl ak rejim kolonèl Mohammar Khadafi yo, ki oblije rekile pi lwen vil la.
Pandansetan ajans l’ONU ki okipe zafè refijye a lanse apèl bay peyi manm Inyon Ewòp la ak kaptenn bato ki nan rejyon Meditèrane a, pou mande yo ede moun k ap kouri kite Libi pou yo evite vyolans k ap dewoule nan peyi a.