Accessibility links

Breaking News

Madi 2 Novanm: Vòt Pou Kongrè, Gouvènè ak Pòs Eta e Lokal Ozetazini


Ozetazini, Prezidan Barack Obama mete fen nan yon toune elektoral ki te mennen li nan 4 eta --toune kote li ankouraje elektè demokrat yo pou yo soti al vote nan eleksyon ki pral dewoule madi 2 novanm nan, yon fason pou limite avans pwonostik yo prevwa repibliken yo pral genyen nan eleksyon sa a.

Misye Obama te pale, antwòt, devan yon foul patizan ki te reyini dimanch 31 oktòb 2010 la nan vil Cleveland, nan eta Ohio.Prezidan Obama di foul la: “Gade byen, moun Cleveland-yo; pa kite pèsonn moun di nou batay sa a pa vo lapènn.”

Youn nan pèsonalite politik ki nan tèt mouvman opozisyon kont misye Obama a, se ansyen gouvènè Eta Alaska, Sarah Palin, ki pa sispann pale pou l mande elektè yo vote kont Pati Demokrat la, --an palan de pati prezidan Obama-a ki, daprè li, pa rive reyalize pwomès li te fè pandan kanpay elektoral 2008 la.

Sarah Palin fè konnen: “Mwen panse se pral yon tranblemanntè politik e mesaj n ap voye a, se pou n di ke mesye-dam Lagòch yo echwe e pèp ameriken an ap leve pou l mande gouvènman ki pi piti, paske gouvènman ki pi piti se sèl mwayen pou peyi a retounen sou bon chemen an.”

Lendi premye novanm 2010 la, Repibliken ak Demokrat ap fè yon dènye efò pou yo jwenn vot elektè yo. Dènye sondaj- yo montre Repibliken yo byen plase pou yo pran kontwòl o mwen youn nan 2 chanm yo (an palan de chanm dè reprezantan an).

Sou mil 500 votan evantyèl ki reponn kesyon jounal USA Today ak òganizasyon sondaj Gallup, 55% di yo pral vote pou repibliken yo, tandiske 45% di y ap apiye demokrat yo –se pi gwo maj yon sondaj anrejistre depi ane 1974 –donk, depi plis pase 35 kan.

XS
SM
MD
LG