Accessibility links

Libi: Konsèy Nasyonal Tranzisyon an Anonse L ap Egzije Ekstradisyon Manm Fanmi Kolonèl Kadhafi ki nan Peyi Aljeri

  • VOA Nouvèl

Mahmoud Shammam

Lidè rebel yo nan Libi fè konnen yo egzije ekstradisyon madanm kolonèl Mohammar Kadhafi ak 3 pitit misye Kadhafi, ki twouve yo nan Aljeri aprè yo te antre nan peyi sa a nan kòmansman jounen lendi 29 out 2011 la. Ministè afè etranjè aljeryen an anonse madanm Kadhafi, Safira, yon pitit-fi li, Aisha, ak 2 pitit-gason Kadhafi (Mohammad ak Hannibal), travèse fwontyè a nan machin pou yo antre sou tèritwa aljeryen an. Menm sous la di madanm pitit Kadhafi yo ak tout pitit yo debake tou nan Aljeri.

Otorite Aljeri yo di yo mete Sekretè Jeneral l ONU an, Ban Ki-moon, ak otorite nan Konsèy Nasyonal Tranzisyon an nan Libi o-kouran nouvèl la. Anvan sa lidè Tranzisyon an (kidonk, lidè mouvman rebel libyen an) te akize peyi Aljeri deske li t ap apiye rejim Kadhafi a epi li ta mete mèsenè a la dispozisyon n pou kraze mouvman rebelyon an.

Mahmoud Shammam, minis enfòmasyon Konsèy Tranzisyon ki ranvèse rejim Kadhafi a, di:

“Nou pral itilize tout mwayen pou n fè manm fanmi an retounen e jije yo. N ap rele yo devan tribinal e nap jije yo. Sa se objektif nou. Nou pral bay tout manm fanmi Kadhafi a yon pwosè jis e kòrèk. Se yon bagay nou garanti. An plis de sa, nou ankouraje lòt peyi pou yo pa ba yo azil, ni Kadhafi, ni manm fanmi n. Paske nou pral konsidere tout aksyon konsa kòm yon aksyon agresyon kont volonte pèp libyen an.”

Moun pa wè kolonèl Kadhafi depi rebèl yo te mete men sou kapital Libi a, Tripoli, semèn pase a; men La Mezon Blanch fè konnen gouvènman ameriken an pa genyen okenn prèv ki ta montre Misye Kadahfi deja kite tèritwa libyen an. Se konsa tou, moun pa konnen ki kote 2 lòt pitit gason kolonèl la ye; 2 mesye sa yo te jwe yon wòl enpòtan nan vi militè e ekonomik peyi a. Pandansetan, yon gwoup ameriken ki la pou defann dwamoun fè konnen li gen prèv ki montre li posib pou fòs militè ki t ap defan rejim Kadhafi a te komèt krim de gè nan vil Misrata.

XS
SM
MD
LG