Larisi fè konnen jedi li gen tan deplase tout manm ekipaj yon bato de gè li ki te nan Lanme Nwa a apre yon eksplozyon te pran abo a; sepandan Ikrèn di se li ki te atake bato a avèk misil.
Ministè defans ris la di yon dife pwovoke eksplozyon minisyon abò bato gid misil la ki rele Moskva; men yo te prese etenn dife a epi bato a toujou kanpe sou lanmè a. Ministè a ajoute prensipal zam ki sou bato a pa sibi domaj epi efò ap fèt pou pèmèt bato a retounen nan pò li. Sepandan, gouvènè Odesa a di Ikrèn te lanse 2 misil kwazyè ki al frape batiman an.
Sekretè laprès Pentagòn nan, John Kirby, fe CNN konnen “te gen yon eksplozyon” abò bato a, men “nou poko konnen egzakteman kisa k pase la a. Nou byen okouran te gen yon eksplozyon -omwen yon eksplozyon nan bato a- se yon gwo eksplozyon ki koze bon jan dega sou bato a.”