Accessibility links

Breaking News

La Mezon Blanch ap Evalye Chans pou l Jwenn yon Antant sou Dèt Nasyonal la


Prezidan ameriken an, Barack Obama (mitan) nan yon rankont avèk lidè Kongrè a sou rediksyon defisi federal la nan La Mezon Blanch, Washington, 13 jiyè 2011

Otorite nan La Mezon Blanch di yo pral evalye nan jounen vandredi 15 jiyè 2011 la chans ki genyen pou yo rive jwenn yon antant ak pati opozisyon an (kidonk, Pati Repibliken an) sou kesyon pou yo leve nivo plafon dèt nasyonal la dekwa pou gouvènman federal kapab prete plis lajan. Jay Carney, sekretè laprès Prezidan Obama, fè konnen kèk gwo otorite nan administrasyon an pral diskite pou konnen eske yon antant konsa posib e yo pral chache wè tou kisa pou yo fè si li pa posib. Misye Carney di –nap site:

“Prezidan Obama konsidere jounen vandredi a kòm yon moman enpòtan kote nou pral kapab evalye si n ap avanse nan direksyon yon akò enpòtan ant 2 pati yo sou kesyon rediksyon defisi a oubyen non.”

Prezidan Barack Obama ak Prezidan Chanm Depite a, Repibliiken John Boehner, nan La Mezon Blanch, Washington, 13 jiyè 2011
Prezidan Barack Obama ak Prezidan Chanm Depite a, Repibliiken John Boehner, nan La Mezon Blanch, Washington, 13 jiyè 2011

Palmantè demokrat yo rejte divès plan sou rediksyon defisi a ke repibliken yo te prezante, paske yo te gen ladan yo rediksyon nan lajan ki la pou pwogram sosyal yo. Lidè repibliken nan kongrè a (pami yo genyen lidè minorite a nan Sena a, Mitch McConnel) denonse ensistans Demokrat yo pou yo ogmante taks yo.

Misye McConnel di:

“Repibliken yo pa pral tounen kolektè taks pou politik ekonomik Obama a. Moun pa pral fè nou pran yon move antant kòm yon bon antant. Si Prezidan Obama ak majorite demokrat la nan Sena a ta pito prete lajan e fè n bliye difikilte peyi a ap travèse yo, san di pètèt yo gen dwa fè sa. Men yo pa fèt pou espere yo pral pran Repibliken yo pou fè yo sèvi dra. Pap gen sa pyès.”

Pandansetan Jamie Dimon, Prezidan Direktè Jeneral konpayi J.P. Morgan Chase --youn nan pi gwo konpayi finansye ki genyen Ozetazini-- lanse apèl bay 2 pati yo pou l priye yo an gras chache jwenn yon antant sou mwayen pou yo leve plafon dèt nasyonal la. Divès lòt konpayi k ap travay nan sektè kredi a lanse menm apèl sa a.

XS
SM
MD
LG