Nan Lachin otorite yo lanse lide pou yo ranvwaye yon kongrè anyèl ki rele “Twa Sesyon” ki te sipoze reyini, nan mwa mas la, asanble lejislativ nasyonal la avèk komite santral k ap dirije peyi a. Ajans nouvèl leta chinwa a, Chin Nouvèl ki bay enfòmasyon an, presize otorite yo pral pran yon desizyon final lendi pwochen sou kesyon an. Gen obsèvatè ki panse, yon fwa komite santral Pati Kominis la va fin apwouve pwopozisyon an, desizyon an ap montre ke lit kont epidemi kowonaviris la (ou maladi COVID19 la) tounen yon veritab priyorite pou gouvènman an. Se konsa tou gouvènman an ranwaye deba ki te gen pou fèt sou kèk dosye enpòtan konsènan politik piblik peyi a –pami yo genyen bidjè militè anyèl la avèk pwojeksyon sou avni imedya ekonomi chinwaz la.
Dapre analis yo, posiblite pou gouvènman chinwa a ranvwaye reyalizasyon kèk pwen enpòtan nan pwogram li se yon siyn ki montre ane ki fèk kòmanse a pral poze kèk gwo defi pou prensipal dirijan nan leadership peyi a sou plan politik ak ekonomik.
Pòtpawòl Kongrè Nasyonal Pèp Chinwa a (KNP), Zang Tiewei, deklare:
“Nou rive nan yon moman kritik kote Lachin dwe konbat epidemi an e bloke pwogrè viris la yon fwa pou tout.”
Misye Zang pale konsa nan yon entèvyou li bay Chin Nouvèl aprè yon rankont KNP a. Li ajoute:
“Delege Konsèy Nasyonal Pèp la nan yon tyè (1/3) tout pwovens peyi a ap jwe yon wòl enpòtan kòm chef-de-fil batay kont viris mòtèl la. Konsa, li nesesè pou n anvizaje posiblite pou n ranvwaye rankont mwa mas yo –yon mosyon nou pral debat pi ta mwa sa a.”