Accessibility links

Breaking News

Konsil Ayiti nan Repiblik Dominikèn 'Kondane ak Tout Fòs li' Arestasyon Sitwayen Ayisyen nan yon Restoran


credits: IG@laromatecreole

Konsil Jeneral peyi d'Ayiti nan Repiblik Dominikèn James Jacques, pibliye yon deklarasyon ann Espayòl kote li kondane "ak tout fòs li" operasyon ajan imigrasyon Dominiken lanse 24 Jyen nan aswè kont yon restoran Ayisyen ki rele L'Aromate Creole. Konsil la di li konsidere operasyon sa a tankou yon "vyolasyon lwa migrasyon Repiblik Dominikèn."

Dapre konsil la, lè li te rive nan espas la li te wè 2 otobis imigrasyon chaje ak Ayisyen. Pami moun operasyon sa a te vize, gen ko-pwopriyetè restoran an, Jonathan Solano, yon Ayisyen Dominiken ki gen rezidans legal nan peyi a. Solano pibliye yon videyo sou rezo sosyal TikTok kote li denonse operasyon an.

"Yè swa yo pran'm, ajan imigrasyon pran'm menm, jis paske yo di mwen pale Kreyol e yo di'm ke , tout kat idantifikasyon mwen prezante bay yo se fo," Solano esplike. "Yo menm di'm ke fò'm mache ak akt de nesans mwen - e lè mwen montre yo sa (paspò li) yo mande'm kote viza Dominiken an nan yon paspò Dominiken. Non! Fò'm repete'l li ridikil."

Solano di nan videyo a papa'l se Dominiken e manman'l se Ayisyèn. Li kite Ayiti pou'l vinn enstale'l nan Repiblik Dominikèn akoz ensekirite a.

Konsil James Jacques nan deklarasyon li pibliye a di li t'al sou sèn nan apre li te resevwa apèl sitwayen Ayisyen ki te gen kè sote pou sityasyon an. Li di prensipal objektif li sete asire ke dwa Ayisyen yo te respekte e pwoteje pandan operasyon sa a.

Konsil la presize gen yon "mekanism rapatriman" ki siyen ant Ayiti ak Repiblik Dominikèn depi 1999 e ki di otorite imigrasyon Dominiken yo pa fèt pou mennen operasyon ant 6 zè di swa ak 8 hè di maten. Antant sa a di tou pap gen okenn rapatriman ki fèt jou Dimanch ak jou ferye yo eksepte ant 8 hè di maten ak midi.

"Nou pa la pou anpeche imigrasyon Dominiken fè travay li," konsil la deklare, "nou senpman vle asire nou ke dwa sitwayen nou yo respekte."

Konsil la di nan menm espas la gen yon ajans vwayaj ki rele Nenel Tours, ki òganize vwayaj ant Santiago ak Pòtoprens chak Madi ak Vandredi. Li kontinye pou l di ke "Konsila a pa okouran okenn trafik paspò ni viza" nan lokal sa a.

VOA Kreyòl pran kontak ak sèvis imigrasyon Dominiken an pa rapò ak ensidan sa a. Nou poko jwenn repons.

XS
SM
MD
LG