Accessibility links

Breaking News

Kominote Entènasyonal la Montre Sipò li Pou Eleksyon ann Ayiti


Kominote entènasyonal la ap sipòte pwosesis elektoral la ann Ayiti menm lè plizyè pati politik nan opozisyon an ap manifeste pou mande ranvwa total ou chanjman pasyèl nan enstitisyon elektoral la, KEP.

Reprezantan sekretè jeneral Nasyonzini ann Ayiti, Edmond Mullet, di òganizasyon an ap defann enstitisyon yo e non manm enstitisyon yo.

Edmond Mullet ki t ap rankontre laprès di òganizasyon mondyal la ap bay tout mwayen lojistik ak sekirite nesesè pou pèmèt dewoulman eleksyon yo.

Kominote entènasyonal la ensiste sou enpòtans eleksyon yo pou rete nan espri konsitisyon 1987 la ki fikse eleksyon prezidansyèl yo pou dènye dimanch mwa Novanm.

Sipriz nan pwosesis elektoral se desizyon Sekretè Jeneral Rasanbleman Demokrat Pwogresist yo (RDNP) madam Mirlande Manigat pran pou l abadone Platfòm Politik Patriyòt Ayisyen, PLAPH.

Madam Manigat anrejistre pati li a pou l patisipe nan eleksyon prezidansyèl yo. Òganizasyon Eta Ameriken yo déjà anonse deplwaman 193 obsèvatè sou plas ann Ayiti

Caricom (mache komen karayib la) ak OEA ap rete nan peyi a jiskapre eleksyon yo. Operasyon sa a ap koute 5 milyon 300 mil dola.

Obsèvatè politik yo di yo espere prezans obsèvatè òganizasyon rejyonal la kapab anpeche magouy e bay kandida yo plis konfyans ke pwosesis la va onèt e demokratik.

Isit Washington, yo te diskite sou kesyon eleksyon an nan yon seyans depozisyon reprezantan kèk Òganizasyon Non Gouvènmantal te fè devan Komisyon Afè Etranjè Kongrè ameriken an.

Madam Joia Jefferson Nuri, chèf pèsonèl Forum Trans-Africa, di eleksyon yo se yon okazyon pou ayisyen patisipe an mass a kondisyon pwosesis la onèt, demokratik e louvri pou tout sektè.

Responsab Trans-Africa a mande kominote entènasyonal la kore mouvman eleksyon an nan peyi Dayiti.

Malgre difikilte sa yo, Konsèy Elektoral la kontinye ap vanse ak pwosesis la. Enskripsyon pou pòs prezidan an louvri depi 29 jiyè e li dwe bout 7 Out.

Pami kandida ki deklare yo, nou jwen sekretè jeneral RDNP, a pwofesè Mirlande H. Manigat.

Eske gwoup Altènativ, ki gen landa-n Evans Paul ak pwofesè Victor Benoît, ap chanje pozisyon n odènye moman pou l ajoute non yo sou lis kandida yo? Yon dosye ki rete ouvè jisko 7 out, dat lis enskripsyon pou kandida pou pòs prezidan an ap fèmen.

XS
SM
MD
LG