Accessibility links

Prezidan Donald Trump Rankontre ak Gouvènè Plizyè Lòt Eta sou Evolizyon Siklòn Irma a

  • Ekip Sèvis Kreyòl VOA

Prezidan ameriken an, Donald Trump. (Foto: 5 septanm 2017.)

Prezidan ameriken an, Donald Trump pale ak gouvènè Alabama, Jòji, Karolin di Sid ak Tinizi nan moman siklòn Irma ap pran direksyon nò Etazini tou dousman. 4 eta sa yo kapab sibi frap move tan an ki ap boulvèse zòn yo rele Florid Keys yo, dimanch maten 10 septanm 2017 la.

Lamezon Blanch fè konnen premye sitwayen peyi a pale ak gouvènè yo dimanch la nan Kan David, Camp David, ki se yon kay vakans prezidansyèl nan eta Maryland kote lap pase wikenn li.

Prezidan Trump an kontak sere ak gouvènè Florid la, Rick Scott ak Senatè Florid la, Marco Rubio depi pandan semèn pase a anvan ouragan Irma te rive nan eta sa a.

Chèf pèsonèl Mezon Blanch la, John Kelly te pale ak lòt Senatè Florid la, Bill Nelson, nan menm jounen dimanch la. Mesye Trump ak tout Vis-Prezidan ameriken an, Mike Pence kontinye resevwa dènye enfòmasyon sou jan sitiyasyon an ap evolye nan eta Florid la ki anba frap ouragan sovaj Irma a.

Irma te frape tou zòn Karayib la, e li kite dèyè yon pakèk destriksyon nan kèk ti antiy. Sepandan, sou kote zile Ayiti ak Sen Someng, Irma te pase san twòp gwo dega. Toutfwa, yo anrejistre anpil inondasyon nan nodès ak nòdwès peyi Dayiti. Men otorite ayisyen yo poko bay yon bilan definitif sou dega siklòn nan.

XS
SM
MD
LG