Gadkòt Ameriken Sezi sou Kòt Amerik Santral la Kokayin ki Vo 180 Milyon Dola
Ekip Sèvis Kreyòl VOA
Bato gadkòt Lèzetazini ki patisipe nan operasyon sezi dwòg sou kòt pasifik Amerik Santral la.
Gadkòt Ameriken Sezi sou Kòt Amerik Santral la Kokayin ki Vo 180 Milyon Dola
WASHINGTON, DC —
Kaptenn Gad Kòt ameriken Mark Fedor di otorite yo sezi 6 tòn kokayin ke yo dechaje nan pati sid Eta Florid jedi 10 me 2018 la. Gad kòt te mete ansanm ak responsab peyi Meksik e Kolonbi nan yon misyon 20 jou kote yo arete 11 swadizan kontrebandye sou kòt Pasifik la.
Nan kad operasyon sa a, gadkòt arete 11 kontrebandye yo sou akizasyon deske yo itilize ti kannòt rapid pou yo transpòte poud la. Kaptenn Mark Fedor di: "Nou remèt kokayin nan bay DEA (Ajans Ameriken pou Kontwòl Dwòg) ki, li menm, sèvi ak yon pati pou li fè jije kotrebandye yo epi li detrui rès la.
Kaptenn Mark Fedor, pòtpawòl gadkòt Lèzetazini.
Kaptenn Fedor ajoute: "Chak nan balo dwòg sa yo reprezante vyolans, koripsyon ak enstablite ki egziste nan rejyon Amerik Santral la ki pa ka absòbe dwòg la. Alòs lè w wè pwoblèm ki poze nan fwontyè sid peyi nou an, se kokayin ki a la baz yo."
