Accessibility links

Etazini Ofri 204 Milyon Dola Pou Efase Dèt Ayiti

  • VOA Nouvèl

Lèzetazini siyen, jedi 30 septanm 2010 la, yon pwotokòl avèk Bank Entè-Amerikèn Devlopman (La BID)pou peye yon pati nan dèt peyi Dayiti enstitisyon finansye entènasyonal yo anile.

Se Sou-Sekretè ameriken pou Trezò ak Afè Entènasyonal, Lael Brainard, ki siyen pwotokòl sa a. Prezidan Bank Entè-Amerikèn Devlopman, Louis Alberto Moreno, apoze sityati pa l sou dokiman an. Asistan chèf misyon diplomatik Ayiti nan Washington, William Exantus, te reprezante minis finans ayisyen an, Ronald Bodin, ki pat fè deplasman an.

Avèk siyati Madam Brainard la, Lèzetazini peye La BID 204 milyon dola sou 479 milyon 48 peyi manm yo aksepte efase pou Ayiti. Sou-Sekretè Deta Brainard presize enpòtans seremoni sa a nan mikwo Lavwadlamerik.

Madam Brainard di: "Seremoni sa a gen anpil enpòtans pou Lèzetazini ki rive bay kontribisyon n rapidman nan pwosesis anilasyon total dèt Ayiti a. Se yon pati nan gwo angajman nou anvè Ayiti. Lèzetazini kontribye tou nan Fon garanti pasyèl ki pral pèmèt bank lokal yo nan peyi a prete ti biznis yo lajan. Lajan sa a reprezante yon pati nan gwo kontribisyon Etatzini pou rekonstriksyon Ayiti."

Prezidan Bank Entè-ameriken Devlopman, Luis Alberto Moreno, remèsye LèzetazIni pou kontribusyon li nan efasman dèt Ayiti a. Mesye Moreno pote presizyon sou fason yo pral itilize resous sa yo.

Li di: "Pwotokòl Etazini siyen avèk La BID la pèmèt bank la jwenn 204 milyon dola ki vinn ogmante Fon Operasyon Espesyal nou. Lajan sa a pral antre nan anvlòp 2milya 500 milyon dola nou mete akote pou Ayiti ki pral gen pou resevwa 200 milyon dola chak ane padan 10 zan. Lajan sa pral pèmèt Fon Pou Rekonstriksyon Ayiti a finanse plizyè pwojè CIRH deja seleksyone."

Louis Alberto Moreno se reprezantan La BID nan Komisyon Enterimè Pou Rekonstriksyon Ayiti a (CIRH).

XS
SM
MD
LG