Accessibility links

Breaking News

Etazini-Bin Laden: Plis Reyaksyon Apre Lanmò Lidè Al-Kayda a


Prezidan ameriken an Barack Obama

Prezidan ameriken an Barack Obama, genyen pou l rankontre vandredi 6 me 2011 la avèk manm fòs delit La Marin-de-gè Lèzetazini ki te patisipe nan kou-de-fòs ki touye lidè rezo al-Kayda a, Osama bin Laden lendi 2 me 2011 la nan Pakistan.

Se konsa prezidan an ap fè deplasman pou l ale nan Fò Campbell, nan eta Kentucky, pou l remèsye manm kò-delit sa a pèsonèlman ak lòt manm lame amerikèn nan pou sèvis yo aprè atak la ki te dewoule nan vil Abbotabad, pa lwen ak Islamabad, kapital Pakistan.

Daprè otorite ameriken yo, premye revizyon yo fè sou dokiman yo sezi nan gwo batiman kote Bin Laden te kache a, montre al-Kaida tap fè plan pou l lanse konplo teworis kont sèvis transpò pa tren kèk kote yo Zetazini; dokiman yo pa idantifye kote sa yo, men sanble militan rezo teworis la ta dwe egzekite konplo yo nan okazyon 10èm. anivèsè atak teworis 11 septanm 2001 yo.

Yon lòt kote, yon dokiman ki sòti nan Depatman Sekirite Tèritoryal Lèzetazini an e ki tonbe nan men laprès jedi 5 me a, fè konnen al-Kayda t ap planifye pou l deranje ray yon tren yon fason pou l ta tonbe anba yon pon oubyen nan yon ravin.

Sepandan otorite yo di yo pa gen prèv ki ta montre yon plan konsa te an preparasyon aktif. Pandansetan, jounal Washington Post ekri pou l di CIA (Sèvis Sekrè Lèzetazini an) te lwe e ekipe yon kay ki te chaje ak sekirite nan Pakistan, pou yon ekip espyon ki te ranmase enfòmasyon sekrè pandan plizyè mwa sou antre-sòti ki tap fèt nan kay kote bin Laden te kache a.

Nouvèl la, ki site kèk otorite ameriken, fè konnen otorite CIA yo te prezante devan Kongrè a nan mwa desanm pase a pou yo te jwenn pèmisyon pou yo itilize plizyè dizèn milyon dola pou yo te finanse aktivite ki tap fèt nan kay yo te lwe tou prè rezidans bin Laden nan.

Toujou nouvèl konsènan dosye Bin Laden nan: Jedi 5 me 2011 la, 4 jou apre lanmò lidè al-Kayda a, Prezidan Barack Obama te fè deplasman nan New York pou l te onore viktim atak teworis 11 septanm 2001 yo.

XS
SM
MD
LG