Isit Washington, Chanm dè Reprezantan Ameriken an vote 277 pou e 148 kont, pou apwouve yon pwojè-lwa sou taks federal, ki se yon konpwomi Prezidan Barack Obama te jwenn ak lidè repibliken nan kongrè a.
Pwojè lwa a prevwa depans pou 858 milya dola e li vin kore desizyon pou gouvènman ameriken an koupe taks ni pou klas mwayèn nan ni pou moun ki rich yo.
Lwa sa a ap pwolonje benefis pou moun ki nan chomaj depi lontan yo e li mache ak yon rediksyon 2% taks sou lajan tout kontibyab ameriken yo ap touche.
Se yon anvlòp esansyèl pou ekonomi an, daprè sa Prezidan Obama te di nan moman li t ap ankouraje palmantè yo pou yo vote an favè pwojè-lwa. Sepandan anpil manm Pati Demokrat la ---Pati Prezidan Obama a--- te di se yon konpwomi ki twò dous pou moun rich yo.