Accessibility links

Breaking News

Kiba-Politik: Raul Castro Anonse L Ap Kite Pouvwa a Anvan Fen Mwa d Avril 2018 la


Prezidan Kiba a, Raúl Castro, ki te pran lapawòl nan Kongrè a nan La Avàn, nan dat 24 fevriye 2018 la. Li anonse l ap kite pouvwa a pandan dewoulman asanble nasyonal k ap kòmanse mèkredi 18 avril 2018 la.
Nan Kiba, otorite yo avanse dat ouvèti sesyon Asanble Nasyonal la kote yo gen pou chwazi nouvo prezidan ki pral ranplase Raul Castro a. Se radyo Leta a, Radio Rebelde, ki anonse nouvèl la nan kòmansman jounen lendi 16 avril 2018 la.
Seleksyon manm asanble tou nèf la te fèt nan mwa mas pase a. Okòmansman yo te fikse ouvèti sesyon an pou jedi pwochen 19 avril la; men otorite yo avanse dat la pou mèkredi 18 la, jou kote asanble a pral kòmanse a 9:00AM, lè Miami ak Pòtoprens, swa 13:00 GMT.

Daprè sa Radio Rebelde ekri sou sit-entènèt li, objektif chanjman sa a se "fasilite devlopman tout faz yon sesyon enpòtans konsa reklame." Sepandan, radyo a pa presize konbe tan sesyon an pral dire.

Premye Vis Prezidan kiben an, Miguel Diaz-Canel (chemiz blan, nan mitan), ki byen plase pou l tounen pwochen prezidan peyi a. Li t ap pran lapawòl pandan yon sesyon palman an nan La Avàn.
Premye Vis Prezidan kiben an, Miguel Diaz-Canel (chemiz blan, nan mitan), ki byen plase pou l tounen pwochen prezidan peyi a. Li t ap pran lapawòl pandan yon sesyon palman an nan La Avàn.

Raul Castro, ki gen 86 zan, te anonse li pral kite plas prezidan an pandan pwochen sesyon asanble nasyonal la, apre 2 manda 5 ane chak youn apre lòt. Pèsonalite yo prevwa ki pral ranplase l la se Premye Vis Prezidan an, Miguel Diaz-Canel.

Konsa, Misye Diaz-Canel, ki gen 57 tan, ka tounen premye prezidan kiben ki te pran nesans apre triyonf revolisyon de goch la nan Kiba an 1959. Raul Castro, ki te pran rèn pouvwa a ofisyèlman sa gen 10 zan aprè gran frè li a, Fidel Castro, te bay demisyon l, pral konsève plas chèf Pati Kominis la, ki se sèl pati politik nan Kiba.

XS
SM
MD
LG