Accessibility links

Breaking News

Brezil-Venezuela: Tansyon an Byen Wo sou Fwontyè ant 2 Peyi yo.


Brezilyen mete dife nan yon kan pou refijye venezyelyen o Brezil, apre nouvèl yo te di imigran venezuelyen te bat yon mèt boutik nan zòn nan epi yo vòlè sa l posede.

O Brezil otorite yo deside voye sòlda sou fwontyè peyi yo avèk Venezuela nan moman tansyon an ap monte nan zòn vil Pacaraima, nan Eta Romaira, ki tou prè fwontyè a, apre nouvèl yo te di imigran venezuelyen te bat yon mèt boutik nan zòn nan epi yo vòlè sa l posede. Sòlda brezilyen yo dwe rive nan zòn nan lendi 20 out 2018 la.

Enkoni te bat mèt boutik la nan kòmansman jounen samdi 18 out la e rezidan vil Pacaraima di se imigran venezuelyen ki komèt zak la. Aprè sa moun nan zòn nan te anvayi yon kan enpwovize kote refijye venezuelyen ap viv e yo mete dife nan sa imigran sa yo posede. Youn nan venezuelyen yo, Carol Mercano ki pale ak laprès, fè deklarasyon sa a:

"Se yon bagay tèrib; yo boule tant kote nou t ap viv la ak tout bagay ki te ladan n. Nou te tande anpil koutzam e se pa 2 kawoutyou yo pa boule nan zòn nan."

Venezuelyèn Joanna avèk ti pitit li, Bruno, sou bra l. Li kanpe bò kote debri matlas ak lot efè pèsonèl li ke sivil brezilyen boule. Li gen nan men li daypè ke otorite yo nan Eta Romaira fè l kado. (Foto: Nacho Doce/REUTERS).
Venezuelyèn Joanna avèk ti pitit li, Bruno, sou bra l. Li kanpe bò kote debri matlas ak lot efè pèsonèl li ke sivil brezilyen boule. Li gen nan men li daypè ke otorite yo nan Eta Romaira fè l kado. (Foto: Nacho Doce/REUTERS).

Daprè lapolis brezilyèn, plizyè santèn venezuelyen kouri tounen nan peyi yo pou yo pa t viktim zak vyolans ki t ap fèt sou konpatriyòt yo samdi pase a.

Pandan 3 zan ki pase yo, plizyè dizèn milye sitwayen venezuelyen ale mande azil o Brezil pou yo kapab kouri pou yon kriz ekonomik, politik e sosyal ki pete nan peyi yo.

XS
SM
MD
LG