Accessibility links

Breaking News

Ayiti-Meteo: Ayiti Aba Menas Ouragan Matthew


Siklòn Matthew

Dapre Sant Nasyonal Meteo Ameriken an nan Miami, siklòn Matthew ap touche Jamayik aswè lendi a e lès peyi Kiba madi maten. Men ann Ayiti nouvèl yo deja rapòte gen gwo van k ap soufle ak lapli nan pati sid peyi a e pou pipiti 2 moun gentan pèdi lavi yo.

Otorite Ayisyen yo kontinye ankouraje moun k ap viv nan zòn arisk yo pou chache refij lòt kote. Selon Minis Enteryè ak Kolektivite Teritoryal yo, François Annick Joseph, gen 1300 abri pwovizwa ki disponib pou ede plizyè santèn milye moun ki an danje.

Minis Joseph deklare gouvènman an pare pou anplwaye lafòs si sa nesesè pou evakye popilasyon k ap viv nan zòn arisk yo. Depatman Sid, Nip, Grandans, Sidès ak Lwès, kote kapital peyi Dayiti sitye se 5 depatman ki anba frap siklòn Matthew. Otorite yo lanse yon eta dalèt wouj nan tout depatman sila yo.

Minis Edikasyon Nasyonal la te mande pou tout lekòl fèmen pòt yo jodi lendi 3 oktòb la ak madi 04 oktòb 2016 la. Anbasad Ameriken ann Ayiti pibliye yon nòt ki anonse pòt anbasad la fèmen pandan 2 jou sa yo. Tout vòl avyon sou peyi Dayiti sispann pandan peryòd pasaj siklòn Matthew.

Ajans Ameriken pou Devlopman Entènasyonal (USAID) pibliye yon nòt pou l di Etazini pare pou asiste gouvènman ak kominote nan rejyon karayib la.

Direktè Sant Nasyonal Meteowoloji Ayisyen an, Ronald Selmelfort, mande popilasyon an pou l swiv konsiy otorite yo pandan pasaj siklòn Matthew sou kot peyi Dayiti.

XS
SM
MD
LG