Accessibility links

1e Janvye 1804 – 1e Janvye 2017 : Ayiti Make 213èm Anivèsè Pwoklamasyon Endepandans li


Prezidan pwovizwa Ayisyen an, Jocelerme Privert, nan okasyon jounen selebrasyon 213èm anivèsè endepandans peyi D Ayiti nan Gonayiv. Premye Janvye 2017. ( Foto: Biwo Kominikasyon Prezidans lan ann Ayiti, 2 janvye 2017)

Prezidan Pwovizwa a, Jocelerme Privert, deklare “li pa nòmal pou, aprè plis pase 2 syèk endepandans, Ayiti kontinye konfwonte pwoblèm ki bloke devlopman ekonomik li.”

Prezidan pwovizwa aysiyen an, Jocelerme Privert, ak Premyè Dam Ginette Michaud Privert, ki te gen avèk yo Premye Minis Ennex Jean Charles, manm kabinè ministeryèl la, prezidan 2 chanm palman an ak manm kò diplomatik la, te prezan nan vil Gonayiv, nan jounen dimanch premye janvye 2017 la, pou make 213èm anivèsè pwoklamasyon endepandans peyi a.

Nan omeli sikonstans la, ofisyan prensipal la, Evèk Yves Marie Péan, lanse yon apèl pou l mande lapè ak inite nan mitan popilasyon an pou byen nasyon an.

Prezidan Privert, ki te pran lapawòl sou plas piblik vil la, mete aksan sou doub pòte istorik dat premye janvye a: dabò se anivèsè Pwoklamasyon Endepandans d Ayiti; epi, 2èman, se selebrasyon Jounen Entènasyonal Lapè.

Daprè chèf deta a, li pa nòmal pou, aprè plis pase 2 syèk endepandans, Ayiti ap konfwonte toujou yon seri pwoblèm ki bloke devlopman ekonomik peyi a. Misye Privert lanse apèl pou l mande rekonsilyasyon, lapè ak dyalòg nan mitan sitwayen ayisyen yo, yon bagay ki, dapre li, “se yon nesesite ijan pou elimine enstabilite ann Ayiti."

Prezidan Jocelerme Privert vizit nan MUPANAH (Le Musée du Panthéon National d’Haiti) 2 janvye 2017, Jounen Ewo Nasyonal Ayisyen yo.
Prezidan Jocelerme Privert vizit nan MUPANAH (Le Musée du Panthéon National d’Haiti) 2 janvye 2017, Jounen Ewo Nasyonal Ayisyen yo.

Yon lòt kote, jounen lendi 2 janvye 2017 la raple Jounen Ewo Nasyonal Ayisyen yo (Le Jour des Aïeux). Nan okazyon an, Prezidan Jocelerme Privert te pran tèt yon delegasyon ofisyèl pou yon vizit nan MUPANAH (Le Musée du Panthéon National d’Haiti). Pandan yon seremoni ki dewoule nan sikonstans la, chèf deta a depose yon jèb fle devan moniman ewo nasyonal yo, tankou Toussaint Louverture, Jean-Jacques Dessalines, Henri Christophe ak Alexandre Pétion.

XS
SM
MD
LG