Accessibility links

Avyon l’OTAN Lanse Lòt Atak sou Kapital Libi a, Tripoli

  • VOA Nouvèl

yon atak LOTAN nan Libi

Byen bonè vandredi 10 jen 2011 la, yon nouvo seri atak ayeryèn l’OTAN lanse, souke kapital Libi a, Tripoli, ak zòn ki ozalantou l yo, yon jou aprè peyi alye yo ak kèk nasyon arab te pran angajman pou yo mete yon asistans plis pase yon milya 100 milyon dola a la dispozisyon konsèy opozisyon Libi a ak sivil k ap sibi move konsekans konfli ki genyen nan peyi a.

Gwoup Kontak Libi a ki genyen 22 peyi manm, anonse jedi yon seri dispozisyon pou li pote asistans finansye bay konsèy la nan yon rankont ki dewoule nan Emira Arab Ini kote yo t ap prepare yon plan pou yon Libi san lidè aktyèl peyi a, Kolonèl Moammar Gadhafi, k ap fè fas ak gwo difikilte pou l rete sou pouvwa a.

Pami peyi ki pran angjaman pou yo bay kòb yo, genyen Itali ki pwomèt 600 milyon dola, Lafrans avèk plis pase 429 milyon dola, epi peyi Kowet ak Tiki. Lèzetazini pa pwomèt okenn èd dirèk pou rebèl yo.

Sepandan li anonse l ap ajoute 26 milyon 500 mil dola sou asistans imanitè li te deja ap bay tout pèp libyen an san distenksyon. Sekretè deta Hillary Clinton, ki te asiste rankont la, bay yon konferans pou laprès kote li fè konnen « Se jou Moammar Gadhafi ap konte pou l kite pouvwa a. »

Chèf diplomasi amerikèn nan kontinye pou l di Konsèy Nasyonal Tranzisyon an se sèl entèlokitè lejitim pèp libyen an, yon entèlokitè ki « patisipe nan diskisyon ak dyalòg k ap fèt yo, pafwa a tit ofisyèl».

XS
SM
MD
LG