Biwo Federal Envestigasyon an (FBI) fè konnen li ouvè yon ankèt pou konnen si ajans nouvèl yon gwo potanta nan afè enfòmasyon posede, te mete sou tab-dekout telefòn moun ki te viktim atak teworis 11 septanm 2001 an ak manm fanmi yo. Gwo potanta sa a se Rupert Murdock.
Kèk sous ki pwòch lajistis Ozetazini di FBI pral chache wè si anplwaye konpayi misye Murdock yo te pran dispozisyon ilegalman pou yo konnen sa k tap di ou byen ekri sou apèl telefònik, imèl oubyen anrejistreman mesaj viktim yo te resevwa aprè atak teworis la ki te rive sa genyen prèske 10 zan; oubyen tou, si yo te eseye bay lapolis kout-lajan anba tab pou yo te kapab jwenn enfòmasyon sa yo.
FBI kòmanse ankèt sa a yon jou aprè Depite Peter King ki reprezante yon sikonskripsyon nan Nouyòk kote plis pase 3 mil moun te viktim nan jou 11 septanm 2001 an, te lanse apèl pou l mande Biwo Federal Envestigasyon an ouvè yon ankèt sou afè a.