Accessibility links

Breaking News

Etazini-Eleksyon : Romney Ranpòte Primè a nan Pòto Riko


Kandida a la prezidans pou Pati Repibliken an, ansyen gouvènè Eta Massachusetts, Mittt Romney

Ozetazini, kandida ki devan nan kous a la prezidans la pou Pati Repibliken an, ansyen gouvènè Eta Massachusetts, Mittt Romney, ranpòte eleksyon primè ki dewoule dimanch nan Poto Riko; konsa li ranfòse pozisyon n kòm kandida ki nan tèt kous la pou pati l la e ki pi byen pase pase lòt yo pou jwenn nominasyon pou l fè fas ak Prezidan Barack Obama nan eleksyon prezidansyèl ki fikse pou novanm 2012 la.

Daprè responsab eleksyon primè a sou zile karayib la, nan moman yo deja fin konte vwa pou majorite biwodvòt yo, Misye Romney ranpòte 83 pou san vwa yo. Prensipal rival li a, ansyen senatè Eta Pennsilvani, Rick Santorum, vini byen lwen dèyè Misye Romney avèk 8 pou san.

Aprè madanm Misye Romney te fin remèsye otorite Pòto Riko yo, sitou gouvènè a, Misye Fortuno, ki se yon repibliken, kandida a te pale tou pou l di :

"Mwen vle ajoute vwa sou vwa madanm mwen pou m di pèp Pòto Riko a mèsi ; mèsi pou Gouvènè Fortuno ak madanm ni, Luce ; mèsi tout moun nan Pòto Riko ki te ede nou ranpòte vikwta ekstwòdinè sa a. Ant parantèz, nou ban mwen 20 delege ; se tout delege ki te an je nan primè sa a. Se yon bon nouvèl pou mwen. Mèsi ; mwen kontan anpil. "

Viktwa sa a pèmèt misye Romney ajoute sou delege li deja genyen, pandan l ap chache yon total 1144 delege ki nesesè pou l jwenn nominasyon pati repibliken an. Madi 20 mas 2012 la, eleksyon primè pral dewoule nan eta Ilinwa, nan sant-wès Lèzetazini.

XS
SM
MD
LG