Accessibility links

Zak Vyolans Ap Kontinye Nan Peyi d Ayiti Pandan Kominote Entènasyonal la Kontinye Ap Travay Pou Ede Ekip Tranzisyon an - 2004-11-10


Men kèk nan prensipal nouvèl ki domine aktyalite a nan peyi d Ayiti nan jounen mèkredi 10 novanm nan:

Plis pase yon dizèn moun mouri e plizyè lòt blese yè madi a nan lese frape ant 2 group ame rival nan Site Solèy, yon katye nan Potoprens kote nou jwenn anpil patizan prezidan ann egzil la, Jn-Bertrand Aristide. Renan Toussaint ap pote detay yo.

Sou menm dosye a, Rotchild François, Jr. di nou vil Pòtoprens te chofe jodi a ak Operasyon Baghdad ke patizan Lavalas yo ap kontinye mennen pou egzije retou fizik lidè egzile a. Jodi a yo mete dife nan omwen yon zòn. Koute repòtaj la pou detay.

Nan Latibonit, manm Fwon Rezistans Nasyonal la [FRN] nan Gonayiv remèt tout materyèl yo te sezi nan yon komisarya polis apre yo te kwape polisye ki te kantone nan zòn nan, dapre korespondan nou Duc Jonathan Joseph

Yon lòt kote, kèk lekòl nan nò peyi d Ayiti resevwa asistans ki pral ede elèv yo pandan ane a. Korespondan nou Yvan Martin Jasmin fè n konnen se ozetazini asistans sa a sòti.

Yon lòt kote, gouvènman ameriken bay Ayiti yon èd 38 milyon dola. Ayiti te deja resevwa nan lajan sa a 4 milyon dola nan kad asistans li te bezwen prese-prese. Rès 34 milyon an ap ede nan efò rekonstriksyon ak reyabilitasyon. Ajans Ameriken pou Devlopman Entènasyonal la (USAID) k'ap administre pwogram sa a, ap gen pou li patisipe nan reparasyon wout, lekòl, sant sante, sistèm idwolik e sanitè ak sistèm kanalizasyon nan vil yo.

Anfen, seksyon konsilè Anbasad Etazini ann Ayiti a fè tout moun konnen, espesyalman moun kap mande viza touris pou vin vizite Etazini, li kreye yon sit Entènèt kote y'ap kapab ranpli fòmilè pou mande viza. Adrès sit la se: http://www.evisaforms.state.gov

Apre moun k'ap mande viza a finn ranpli fòmilè DS-156 la sou sit Entènèt la, lap enprime 3 paj ke l'ap jwenn lè l' fini.

Moun k'ap ranpli fòmulè siplemantè DS-157 --gason ki gen ant 14 ak 45 kan -- ap genyen pou yo kontinye ranpli l' alamen.

Jou randevou a, demandè ki prezante ak fòmilè DS-156 li byen ranpli ap gen priyorite, kidonk se li k'ap pase devan konsil la anvan. Lòt moun yo ap rete tann.

XS
SM
MD
LG