Accessibility links

Premye Minis Pwovizwa Ayisyen an, Gérard Latortue, Swete Pou Etazini Kite Yon Kontenjan Marines Ann Ayiti Apre Fen Misyon yo Premye Jen 2004 la. - 2004-04-24


Delegasyon an te fè vizit sa a vandredi 23 avril 2004 la nan peyi dAyiti. Depite ki te fòme delegasyon sa a se Cass Ballenger (reprezantan Repibliken Eta Caroline Di Nò) e prezidan Soukomite Pou Operasyon Emisfè Oksidantal nan Chanm Reprezantan Ameriken an; Kendrick Meek (Demokrat Miami); Mark Foley (reprezantan Repibliken West Palm Beach); Jeff Miller (Depite Repibliken Pensacola) ak Elija Cummings, reprezantan Demokrat Eta Maryland. Msye Cummings deklare ni prezidan Alexandre ni premye minis Latortue di klèman yo ta renmen pou Etazini kite ann Ayiti yon ti kontenjan marines apre dat premye Jen an--dat kote misyon militè ameriken yo ap rive nan bout li. E li ajoute li menm ak kòlèg "Congressmen" li yo pral pote mesaj la Ozetazini". Aktyèlman, genyen apeprè mil uisan marines (1800) ki fè pati yon fòs mentyen lapè miltinasyonal ki Ayiti depi fen mwa fevriye 2004 la apre yon soulèvman popilè ansanm ak yon rebelyon ame te fòse prezidan nan epòk la, Jean-Bertrand Aristide, bay demisyon l' e pran chimen ekzil. Apre misyon marines yo, premye Jen 2004 la, se yon fòs miltinasyonal Nasyonzini, kap sou kòmandman peyi Brezil, ki pral kontinue jwe wòl marines ak rès fòs miltinasyonal yo ap jwe sou teren an kounye a. Apre yon chita-koze li te genyen ak 2 prensipal dirijan ayisyen yo, msye Foley deklare "depite ameriken yo non sèlman pre pou yo travay men nan men ak gouvènman sa a, men yo deside, antanke reprezantan yon nasyon moun lib, lonje lamen bay Ayiti pou ede'l nan tranzisyon sa a. Depite Foley ajoute li espere angajman sa a se pa pral yon angajman dezoutwa mwa, men yon angajman manch long pou depite yo soutni Ayiti kounye a e kontinue soutni l' nan lavni. Delegasyon depite ameriken an deklare tou (ke) ekip kap dirije Ayiti jounen jodi a ekzèse yon bon enpresyon sou li.

Klike sou lyen anlè a pou'w koute repòtaj Rotchild François Jr. a.

XS
SM
MD
LG