Accessibility links

Etazini Arete yon Ansyen Otorite Wo Plase sou Gouvènman Aristide la - 2004-03-23


Daprè menm otorite yo, li posib pou yo arete plis moun toujou nan kad ankèt yap mennen sou aktivite dwòg an Ayiti.

Oriel Jean se ansyen chèf sèvis sekirite misye Aristide. Li te okipe pòs sa a ant 2001 e 2003 e misye te genyen buwo li nan palè nasyonal la nan Pòtoprens. Jounen jodiya, Oriel Jean twouve l nan yon prizon federal anba lavil Miami, sou akizasyon dèske li te mele nan konplo pou l fè trafik kokayinn.

Joe Kilmer se pòt pawol sèvis anti dwòg ameriken an nan Miami. Misye Kilmer deklare,“mwen kwè nou kapab di: misye Jean pral konparèt devan lajistis anvan lontan. Kantapou lòt moun ankèt la vize, li klè ke mwen pa kapab bay detay sou kilès yo ye. Men mwen kapab di ke ajan nou yo pral pran afè a trè o serye pou yo ale avèk li osi lwen posib; se sa nou fè nan chak ankèt konsa, pou nou konnen ki kote filyè a ap mennen nou.”

Misye Kilmer kontinye pou l di Oriel Jean te rann tèt li volontèman bay otorite ameriken yo, aprè yo te arete li o Kanada poutèt li ta vyole lwa imigrasyon peyi sa a. Misye Jean te kouri kite Ayiti aprè demisyon ansyen prezidan Aristide la mwa pase a. Akizasyon kap peze sou do l la baze sou depozisyon ajan-ransèyman ki fè konnen misye te konn aksepte gwo sòm lajan pou l te kite chajman kokayinn pase an tranzit ann Ayiti. Avoka kap defann Oriel Jean an fè konnen kliyan n nan pral defann tèt li kont akizasyon sa a ak tout fòs.

Opozisyon ayisyèn nan ansanm ak rebèl yo te akize gouvènman jean-Bertrand Aristide la dèske l te mele nan koripsyon e dèske l pat reyisi konbat trafik dwòg. Pandanstan, li pa klè si Misye Aristide pral aksepte òf azil tanporè Nijeria fè li. Pou kounye a, Msye Aristide trouve l nan peyi Jamayik, kote li genyen pou l pase plizyè semèn avan l ale nan yon lòt peyi.

XS
SM
MD
LG