Accessibility links

Depatman Deta Ameriken Mande Gouvènman Ayisyen an Pran Responsablite li - 2004-02-19


Konsèy Pèmanan Òganizasyon Eta Ameriken an ap fè yon reyinyon jodi Jedi a isit Washington, pou li abòde dosye vyolans ki gaye plizyè kote nan peyi d Ayiti. Daprè yon deklarasyon l’OEA pibliye, konsèy pèmanan an pral fè deba tou sou yon pwojè-rezolisyon ki apiye etablisman demokrasi ann Ayiti, kote yon rebelyon ame kont prezidan Jean-Bertrand Aristide deja koze lanmò omwen 55 moun. Yè mèkredi a, Konsèy Pèmanan l’OEA te lanse yon apèl bay gouvènman Aristide la ak dirijan opozisyon an pou l' mande yo travay ansanm pou yo rezoud pasifikman mezantant ki egziste antre yo.

Pandansetan, isit Washington, pòt-pawòl Depatman Deta a, Richard Boucher, fè konnen pi fò nan zak vyolans k'ap dewoule nan peyi d Ayiti yo, se zak manm gang ki, nan yon pase pa tèlman lwen, t'ap travay pou Prezidan Aristide. Alòs, li trèzenpòtan pou moun ki te konn apiye gangstè sa yo, renonse vyolans finalman epi kòmanse travay pou yo tabli yon dyalòg politik.

Avan-yè madi a, Sekretè-deta Colin Powell te fè konnen, otorite yo nan Washington pa tèlman enterese voye twoup militè al mete fen nan vyolans la ann Ayiti. Nap raple ke nèg ame ki leve kanpe kont Prezidan Aristide, pran kontwòl Gonayiv, 4e. vil peyi d Ayiti a, ansanm avèk plizyè bouk ak vilaj nan nò ak nan sant peyi a-- yon peyi ki pa sispann gen pwoblèm depi eleksyon lejislativ konteste mwa me 2000 yo.

XS
SM
MD
LG