Accessibility links

Mahmoud Abbas Demisyone Kòm Premye-Minis Palestinyen - 2003-09-06


Prezidan palestinyen an, Yasser Arafat, aksepte demisyon Premye-Minis li a, Mahmoud Abbas, alyas Abou Mazen, e sa parèt tankou yon move kou pou efò lapè Etazini ak kominote entènasyonal la ap deplwaye yo.

Dapre kèk otorite palestinyen, M. Arafat mande M. Abbas rete nan tèt gouvènman an annatandan gen yon nouvo kabinè.

Mahmoud Abbas, ke anpil obsèvatè konsidere tankou yon politisyen modere, pase apèn 3 mwa nan pòs la, anvan li anonse desizyon n pou li demisyone, jounen jodi a. Avrèdi, depi jedi li te bay yon soupson sou demisyon sa a, paske li te mande Palman palestinyen an swa ba l' ase pouvwa pou li dirije gouvènman an, oswa wetire l' nan pòs la.

Mahmoud Abbas demisyone apre yon lit pou pouvwa ak Prezidan Yasser Arafat, ki te refize pèmèt Premye-Minis la kontwole kèk sektè-kle, tankou sekirite pa egzanp. Gouvènman peyi Izrayèl deklare li pap annafè ak okenn Premye-Minis Arafat nonmen, e li menase pou li voye lidè palestinyen an ann egzil.

XS
SM
MD
LG