Accessibility links

Brezil Refize Apiye Nouvo Sanksyon Kont Iran


Prensipal lidè brezilyen yo rejte apèl Lèzetazini pou yon apiye nouvo sanksyon kont Iran ak pwogram nikleyè Repiblik Islamik la. Minis afè etranjè Brezil la, Celso Amorim, deklare mèkredi Brezil pa pral (se pwòp mo li) pliye devan presyon entènasyonal.

Amorim fè deklarasyon sa a pandan yon konferans pou laprès avèk Sekretè Deta Hillary Clinton ki lanse avètisman pou di Iran pa pral negosye ak bòn fwa san nouvo sanksyon.

Madam Clinton te rankontre tou ak prezidan Luiz Inacio Da Silva (LULA). Anvan chita-koze yo a, lidè brezilyen an te lanse yon "pinga" pou di pa kwense Iran nan yon tanjant aloske genyen posibilite toujou pou negosyasyon yo reyisi.

Inyon Ewopeyèn nan ak responsab ameriken yo te reyini mèkredi nan vil Vyèn, peyi Otrich, avèk manm Ajans Entènasyonal Enèji Atomik la (AIEA ou AEEA) e yo pran angajman pou yo kontinye chèche enpoze nouvo sanksyon kont Iran.

Nasyon oksidantal yo sispèk Iran ap anrichi iranyòm pou'l fabrike zam nikleyè. Teheran reponn "lap eseye sèlman pwodui konbistib nikleyè pou yon reyaktè rechèch". Men anvwaye Lèzetazini nan Ajans Entènasyonal Enèji Atomik la, Glyn Davies, di Iran ap jwe yon jwèt "chat ak sourit" ak ajans Nasyonzini an, an palan AEEA a.

Brezil se yon manm sou 15 ki fòme Konsè Sekirite l'Onu an e li genyen dwa vote, men li pa ka poze veto sou desizyon Konsèy la--yon pouvwa ke sèl 5 manm pèmanan yo: Etazini, Grann' Bretay, France, La Russie ak La chine geyen.

jbjacque@voanews.com

XS
SM
MD
LG