Accessibility links

Kiba ak Etazini Fe Chita Tande


Ofisyèl peyi Etazini ak Kiba te gen pou yo rankontre vandredi pou yo pale pou yon lòt fwa sou pwoblèm imigrasyon.

Pi bonè nan semèn nan, Depatman Deta ameriken te fè konnen randevou sa a pral santre sou fason yo ka enkouraje imigrasyon nan lòd, sekirite ak respè lalwa, ant Kiba ak Etazini.

Nan tèt delegasyon amerikèn nan nou jwenn diplomat Craig Kelly ki se prensipal asistan Sekretè Deta-adjwen pou afè Emisfè Oksidantal la.

Rankont vandredi a rive pandan Kiba kontinye kenbe yon kontraktè ameriken paske La Avàn deklare sitwayen sa a te vin nan yon misyon espionaj sou zile a. Etazini rejte akizasyon an. Gouvènman ameriken an eksplike ke kontraktè sa a travay pou yon antrepriz prive ki rele Development Alternatives, ki vle di “Altènativ pou Devlopman” pa lwen Washington,DC. Dapre konpayi an, nèg sa a--ke yo kenbe depi mwa desanm—t’ap patisipe nan yon pwogram gouvènman ameriken an t’ap finanse pou ranfose sosyete sivil la nan Kiba.

Administrasyon Obama a te rekòmanse fè chita-tande sou imigrasyon ak Kiba ane pase, yon fason pou li chache amelyore relasyon Etazini ak zile kominis sa a ki nan Karayib la. Ansyen prezidan George W. Bush te sispann chita-tande sou imigrasyon yo an 2003.

XS
SM
MD
LG