Accessibility links

Prezidan Obama Pran Responsablite Pèsonèlman Pou Fay Nan Sistèm Sekirite Etazini an


Prezidan Barack Obama pran lapawol apremidi a sou ankèt k'ap kontinye, apre yon nijeryan 23 zan te eseye sote yon avyon ameriken ki te soti Amsterdam, 25 desanm pase a.

Prezidan an di li pase lòd jodi a pou gen plis mezi sekirite pou pwoteje teritwa ameriken an. Li di yo dwe suiv pis yo jwenn e rapousib yo jiskaske yo dejwe konplo ki ta egziste. Li mande pou ransèyman yo distribye pi rapidman e pi lajman posib e pou gen pi bon analiz ransèyman yo. Li di nouvo mezi yo ap ede ajans ransèyman yo fonksyone pi byen e pwoteje Ameriken yo pi byen.

Prezidan Obama pat' mete dlo nan bouch li pou li kritike ajans ransèyman ameriken yo poutèt yo pat' rive anpeche jenn nijeryan sa a (Oumar Farouk Abdullahmutallab) monte abò avyon Northwest Airlines la. Men li pran responsablite pesonèlman pou fay ki gen nan sistem sekirite peyi a.

Msye Obama, ki repran yon fraz selèb ansyen prezidan Harry Truman, di bout-pou-bout, se li ki responsab. Sepandan, li pase lòd pou gen envestigasyon entèn nan depatman ki konsène yo, e pou li resevwa rapò sou rezilta envestigasyon sa yo. Msye Obama di ajans yo te gen ase enfòmasyon pou stope sispèk la, sepandan yo pat' analize ni pataje enfòmasyon sa a kòmsadwa.

Apre deklasyon n' sou ankèt la, Prezidan Obama te voye yon mesaj sou fason li vle pousuiv lit kont teroris yo. Lidè ameriken an di se Ameriken ki pou defini karaktè peyi yo. Se pa yon "bann nèg ki vle touye fanm ak timoun inosan."

Barack Obama lanse yon apèl pou tout Ameriken kole tèt ansanm, mete tout espri patizan sou kote, pou yo mennen batay pou pwoteje nasyon an.

Si ou ta renmen koute repòtaj la an detay, fè klik sou ralonj ki anwo, adwat paj la.

cdorcil@voanews.com

XS
SM
MD
LG