Accessibility links

Gilbert Arena Resevwa yon Suspansyon Avi


NBA/ Arenas

Sispansyon pou yon dure endetèmine san salè se desizyon responsab nan NBA a David Stern pran kont basketè Gilbert Arenas kap jwe nan Washington Wizards. Desizyon an kapab modifye tou depan de rezilta ankèt otorite yo ap men-nen pou konnen rezon Arena te kache revolvè nan yon kazye ekip la isit Washington. Pou chak match Arenas pa jwe lap pèdu anviwon 150 mil dola. An 2008 Washington te siyen yon kontra 111 milyon dola ak vedèt la. Nouvèl yo fè Washington kapab abandone kontra a. Gen lòt jwè ki kapab peye amand pou patisipasyon yo nan jès Arena te fè kote li te sèvi ak 2 dwèt li pou l tire.

Tennis

Bèlj Kim Clijsters monte yon maswife avan li kale Tchèk Lucie Safarova 6-1, 0-6, 6-4 pou l kalifye pou semi final tounwa tenis Brisbane International la Ostralyen an. Justine Henine kalifye ak difikilte fas a Ongwa Melinda Czink 6-2, 3-6, 7-6. Sèb Ana Ivanovic kale adolesan Rus Anastasia Pavlyochenkova 6-4, 7-6 pou l kalifye pou semi final. Alman Andrea Petkovic elimine Slovak Daniela Hantuchova 6-4, 6-2. Nan semi final la Clijsters ap rankontre Petkovic pandan ke Henin pral mate balon fas a Ivanovic.

Nan kategori maskilen an franse Gael Monfils remonte yon defisi pou l kale ameriken James Blake 3-6, 6-3, 6-4. Monfils pral rankontre Tchèk Radek Stepanek.

Toujou nan tenis, Espay kale Ostrali 3 a 0 pou l kalifye pou final koup Hopman par ekip mix kap dewoule nan Perth an Ostrali. Etazini kale Woumani 3 a 0.

Foutbòl/ Azi

Iran, Japon ak Bahren kalifye pou faz final koup Azyatik 2011 la. Iran wouze Sengapour 3 a 1 pandan ke Tailand ak Jordani fè match nul 0 a 0. Japon te fè anpil efò avan li kale Yemen. Barhen toupizi Hong Kong 4 a 0. La chin ak Siri fè match nul menm lè tou 2 peyi yo déjà kalifye. Koup Azyatik la ap dewoule nan Doha Katar an Janvye 2011.

Foutbòl/ Kosta Rika

Malgre Kosta Rika pa kalifye pou faz final koup du mond Afrik du Sud la sa pa anpeche l plizyè peyi enterese jwe kèk amikal ak Chicos yo. Federasyon Foutbòl Kosta Rika a fè konnen seleksyon an ap rankontre Arjantin 26 Janvye nan kapital la San Juan epi 25 Me kont la Frans-responsab poko deside ki kote rankont la ap dewoule. Responsab yo nan federasyon an di la Grès, la Swis, Kore du Nò ak Kore du Sud enterese pou jwe yon rankont ak Kosta Rika.

Foutbòl/ MLS

Defansè seleksyon Gana a, Aziz Ansah, siyen yon kontra pou l jwe nan FC Dallas apre li pase 2 zan ap jwe nan klub Nijeryan Heartland. Ansah ap kapab jwe pou klub ameriken an apre transfer epi otorizasyon otorite ameriken yo.

Foutbòl/ Koup dAfrik

Koup dAfrik dè Nasyon an kap demare Dimanch 10 Janvye a nan Angola pral afekte gran klub Eropeyen yo akoz prèske tout meyè jwè Afriken yo ap evolye nan klub Eropeyen yo. Kèk ekzanp Klub Angle Chelsea kin an tèt chanpyona a pap gen sèvis Ivwaryen Didier Drogba ak Salomon Kalou, mitan teren Nijeryan John Obi Mikel ak Ganeyen Michael Essien. An Frans 38 jwè kap evolye nan 17 klub pral patisipe nan koup dAfrik dè nasyon an. An Itali Inter de Milan pap gen sèvis kamerounè Samuel Eto’o.

XS
SM
MD
LG