Accessibility links

Breaking News

Sant Carter a Ap Travay Pou Dechouke Malaria Ann Ayiti Ak Nan Republik Dominikèn


Ayiti ak Repiblik Dominikèn se 2 dènye peyi nan rejyon karayib la kote maladi malaria (paludisme) ekziste, e ansyen prezidan ameriken Jimmy Carter di li espere wè maladi sa a disparèt nan 2 nan nasyon yo. Lavwad'lamerik fè yon chita-koze dènyèman ak ansyen prezidan an e ak manm Sant ki pote non li an nan Atlanta, Eta Georgie, sou efò yon pou yo redui maladi sa a ke moustik pwovoke.

Lamizè ak enstabilite fè pati lavi zile Ispanyola a, ke Ayiti ak Repiblik Dominikèn. E ansyen prezidan Jimmy Carter di 2 faktè sa yo ede kreye kondisyon pou maladi a layite kò li nan 2 peyi yo, mete ak mank kooperasyon ant 2 vwazen yo.

Misye Carter di :"Gouvènman dominiken ak govènman ayisyen an pa janm finn danse-kole nèt. Men yo tou de fè m' konfyans e fè Sant Carter a konfyans".

Konfyans sa a te pouse misye Carter fè yon vizit nan zile a nan mwa oktòb 2009 la pou eseye motive 2 peyi yo koopere pou desitire malaria yon fwa pou tout lakay yo.

Dr. Donald Hopkins se direktè pwogram sante Sant Carter a, e lap sipèvize efò òganizasyon an nan Repiblik Dominikèn e ann Ayiti. Li di "Sant lan ap chèche jwenn Ayiti ak R.D santre atansyon yo sou pwoblèm nan. Misye Hopkins deklare "dènye vizit misye Carter nan rejyon an pèmèt pwogrè 'sans précédent" fèt tou de kote fwontyè a nan lit pou dechouke malaria a.

"Hopkins di vizit la bay Sant lan yon levye nan ankouraje 2 nasyon yo mete sou pye yon plan bi-nasyonal avèk yon bidjè e ak dat-sib pou elimine palidis sou tout il la disi ane 2010.

Ane sa a, malaria enfekte apeprè 30,000 moun nan peyi Dayiti e plizyè milye lòt nan Repiblik Dominikèn. Yon pwogram pilot Sant Carter a te lanse ane pase ede ralanti pwopagasyon maladi a gras ak distribisyon moustikè ki trete ak ensektisid pou kouvri kabann, e gras ak distribisyon mikwoskòp pou ede detekte prezans jèm malaria a nan analiz echantiyon san.

Dr. Hopkins fè konnen apre vizit ansyen prezidan Jimmy Carter a, yo te chanje anfaz nan lit kont paludism nan. "Sa nou te chèche fè, se santre pwogram nan sou eliminasyon, pa senpleman kontinye trete e kontwole pwoblèm malaria a.

Sant Carter a ap chèchè desitire malaria sou zile Ispanyola disi ane 2010, e dechouke maladi "filaryoz lenfatik"--maladi gwo pye, pye anfle--ke moustik tou pwovoke. Ayiti ak Repiblik Dominikèn se de dènye nasyon nan emisfè oksidantal la kote maladi sa a ekziste. (1)

Selon Doktè Hopkins "Repiblik Dominikèn espere elimine filaryoz lenfatik nan peyi a disi ane kap vini an. Ayiti tou anonse yon plan pou l' elimine maladi sa a lakay li disi 2020 paske genyen pi plis ka filaryoz lenfatik lakay li.

Sa ki vle di, selon misye Carter, lè misyon an reyisi pap genyen maladi sa a ankò okenn kote ankò nan emisfè oksidantal la.

Men misye Carter di reyalizasyon objektif sa a depann anpil sou volonte 2 peyi ki pataje zile Ispanyola a pou yo kontinye koopere.

(1) Pou plis presizyon sou maladi gwo pye a ki rele tou elephantiasis ale sou ralonj sa a:

http://www.who.int/mediacentre/factsheets/fs102/fr/

jbjacque@voanews.com

XS
SM
MD
LG