Accessibility links

Vizit-Sipriz Minis Defans Ameriken an, Robert Gates, nan Afganistan


Nan Afganistan, Prezidan Hamid Karzai pale pou l di: "Peyi-a pap kapab asure sekurite lakay-li ak pwòp fòs polisye e militè pa l kòmsadwa, pa zavan 15 an…." e lidè afgan an lanse apèl pou l mande asistans entènasyonal pou tabli sekurite nan peyi a. Misye Karzai lanse apèl sa a pandan li tap bay yon konferans pou laprès ansanm avèk minis defans ameriken an, Robert Gates, ki fè yon vizit-sipriz nan Kaboul byen bonè jodi madi a. Misye Gates --ki genyen pou l rankontre tou ak kòmandan militè ameriken ki sou teren an nan Afganistan-- di li pral chache konnen opinyon jeneral yo konsènan yon plan prezidan Obama te anonse semèn pase a e ki prevwa, antwòt, anvwa yon ranfò 30 mil sòlda nan Afganistan.

Chèf Pentagòn nan pral pote yon mesaj espesyal bay sòlda ki deja sou teren an nan Afganistan e ki sibi gwo atak pandan mwa pase yo anba men militan Taliban yo ki repran fòs. Misye Gates di –nap site : « Objektif enpòtan konvèsasyon mwen pral genyen espesyalman avèk solda yo, se pou m remèsye yo pou sèvis yo e pou sakrifis yo, e pou m di yo: <<Nap livre lagè sa a pou n ranpòte laviktwa.>>

Misye Gates byen akeyi desizyon peyi alye Lèzetazuni genyen nan l'OTAN yo pran pou yo ajoute 7 mil òm sou yon kontenjan 40 mil sòlda yo te deja genyen nan Afganistan. E chèf Pentagòn nan di laprès kijan li eksplike chanjman sa a nan konpòtman alye l'OTAN yo vizavi lagè a.

« Mwen kwè, an pati, se paske yo konprann sitiyasyon an ap vin pi serye, lap vin pi grav. Men mwen kwè tou rezon an se paske yo konstate langaj la chanje nan gouvènman nou genyen jounen jodiya nan Washington. »

Minis Defans ameriken an fè konnen tou li byen apresye desizyon peyi Pakistan pran pou l ranfòse operasyon lap mennen kont militan rebèlyo sou tèritwa nasyonal li; daprè misye Gates, Lèzatazini dispoze pote bay Islamabad, otan ke posib e pi rapidman posib, tout kout-men otorite pakistanè yo ta mande l.

Jdesmara@voanews.com

XS
SM
MD
LG