Accessibility links

Breaking News

Selebrasyon Jou Aksyon de Gras la Ozetazini


Plizyè milyon Ameriken ap selebre Jou Aksyon-de-Gras la, yon fèt tradisyonèl ki reyini fanmi ak zanmi toupatou atravè peyi a. Nan okazyon an, Lidè ameriken an ak opozisyon repibliken an delivre mesaj bay pèp la pou eksprime gratitid yo.

Prezidan Barack Obama ak fanmi li patisipe nan distribisyon manje bay yon gwoup moun ki defavorize, nan yon katye Washington, DC. Nan mesaj Prezidan Obama delivre sou radio ak Entènèt pou Jou Aksyon de Gras la, li pwofite eksprime gratitid li pou manm Fòs Ame Etazini yo.

Msye Obama di, “Nou kenbe nan panse nou ak priyè nou anpil fanmi kap make Jou Aksyon de Gras sa a ak yon chèz vid, ki rezève pou yon pitit-gason, oubyen yon pitit-fi, yon mari ou yon madanm, ki sou chan d'batay kounye a.”

Nan mesaj Pati Repibliken an, Depite Mike Pence, ki soti nan eta Indiana, te kritike administrasyon an, sitou pou sitiyasyon ekonomik peyi Etazini jounen jodi-a.

Li deklare, “Administrasyon Obama a ak majorite Demokrat la nan Kongrè a pran ekonomi nou an nan yon movèz eta e yo mete l' nan yon eta ki pi mal toujou, akòz agenda ekonomik yo a ki echwe, epi entèvansyon depase limit leta ap fè yo.”

Sepandan, Prezidan Obama ensiste pou l’di pwogram relans ekonomik li a ap bay bon rezilta. Li swete pwochen "Thanksgiving" nan, pwochen Jou Aksyon-de-Gras la va miyò.

Fè klik sou ralonj ki anwo, adwat paj web la pou w'koute repòtaj sa a ak vwa Jn-Pierre Leroy.

XS
SM
MD
LG