Accessibility links

Nouvo Gouvènman Jean-Max Bellerive la Jwenn supò Prensipal Peyi Zanmi Ayiti yo


Peyi zanmi Ayiti--- pami yo Etazini Kanada ak Lafrans--- ak òganizasyon rejyonal e entènasyonal (tankou OEA), pwomèt pou yo kolabore ak nouvo ekip gouvènmantal ayisyen an ki gen nan tèt li Jean-Max Bellerive ki pa yon novis nan domèn tankou planifikasyon, asitans entènasyonal ak kooperasyon, selon l'OEA

Nouvo premye minis la (ki toujou nan tèt ministè planifikasyon ak kooperasyon ekstèn nan pwopmèt pou l atire plis envestisman e kreye plis djòb nan peyi) pa anonse anyen nouvo, men pito yon "chanjman apwòch pa rapò ak gouvènman Michèle Duvivier Pierre-Louis a"--yon demach ki pa jwen apwobasyon tout klas politik la. Pa egzamp, depite Hugues Celestin, yon disidan Platfòm Lespwa (Limonade/Quartier Morin, Depatman Nò) ak tokay li, Arène Dieujuste, (MOCHRENA/Gonaives-Depatman Latibonit) kritike pwogram premye minis la. Yo di deklarasyon politik jeneral misye Bellerive la se yon fotokopi pwogram ansyen gouvènman Pierre-Louis a.

San pèdi tan, gouvènman an gen tan takle dosye elektoral la kote prezidan René Preval soti yon arete prezidansyèl nan menm jounen envestiti 11 novanm nan pou mande pèp la al vote nan pwochèn eleksyon yo.

Nan mwenske yon semèn, mesye Jean Max-Bellerive sòt nan posib premye minis, premye minis deziye, ratifye, enstale. Kounye a, li anbake anba yon nouvo eksperyans politik kote li fè konnen se sou siy kontinuite gouvènman li an pral fonksyone.

Si ou ta renmen koute divès repòtaj dènye devlopman politik sou nouvo premye minis la, fè klik sou ralonj ki anwo, adwat paj la.

XS
SM
MD
LG